Þetta er stórfurðulegt og út í hött

Heimsmarkaðsverð á oliu hefur lækkað um nærri því 10 USD á tunnuna frá því að það náði hæsta gildi fyrir rúmri viku.  Bara í dag (samkvæmt BBC Market Data kl. 15:05 GMT) hefur West Texas Intermediate Crude Oil lækkað um USD 4,57 á tunnuna niður í USD 125,59 og Brent Crude Oil (Norðursjávarolía) lækkað um USD 3,82 á tunnuna í USD 126,16.  Verðið á tunnunni er núna nálægt því sem var á tímabilinu 10. til 20. maí.  Þannig að ekki er hækkunin þess vegna.

Og dollarinn:  Hann hefur lækkað gagnvart íslensku krónunni undanfarna daga, en staðið í stað síðan verðið á olíutunni náði hámarki í um USD 135/tunnu.  Nú ef við skoðum gengi USD á tímabilinu 10. til 20. maí, þá var meðalgildi 1 USD = 77,08 kr, sem er rúmlega 3 kr. hærra en gengið er í dag  Þannig að ekki er hækkunin út hækkun dollarsins.

Samkvæmt þessu eru engin rök fyrir þessari hækkuninni.  Og rökin verða sífellt veikar eftir því sem farið er lengra aftur í tímann.

Eldsneytisverð hækkar

Athugasemdir

[Ágúst H Bjarnason, 30.5.2008 kl. 15:30]

Ég varð furðu lostinn þegar ég las fréttina því ég þóttist vita að olían hefði lækkað í verði undanfarið. Fór að leita á netinu og komst að raun um að svo er.

Þessi hækkun íslensku olíufélaganna er því stórfurðuleg og ennþá merkilegra að þau eru samtaka í vitleysunni. Hvað er á seyði? 

[Steinn M. Jakobsson (IP-tala skráð) 30.5.2008 kl. 21:33]

Olíufélögin eru bara að maka krókinn  !!!  Ég held að við neytendur ættum að sniðganga bensínstöðvarnar og t.d. að kaupa ekki hjá þeim vörur.  Það hefur allt hækkað hjá þeim undanfarið og það mikið.  T.d. kostar einn pakki af Æðibitum 356 kr. hjá N1 en einungis 167 kr. hjá Bónus.  Hættum að versla við hina heilögu þrenningu.

[Marinó G. Njálsson, 30.5.2008 kl. 23:30]

Ágúst, hugsanlega er þetta eftirstöðvar af því þegar N1 hækkaði verðið eitt félaga og neyddist svo til að lækka það aftur af því að hinir fylgdu ekki eftir.  Ég átta mig ekki alveg á þessu og rökin eru ákaflega veik ef litið er til þróunar síðustu daga.