Markmið og árangur af aðgerðapakka ríkisstjórnarinnar

Ríkisstjórnin er að velta fyrir sér aðgerðapakka fyrir heimilin í landinu.  Eitthvað hefur kvissast út um hvað á að gera, en ég ætla í þessum pistli fyrst og fremst að skoða þær hugmyndir sem fengu mesta athygli í "sérfræðingahópi" ríkisstjórnarinnar.

Höfum fyrst í huga hvaða markmið "sérfræðingahópi" ríkisstjórnarinnar voru sett. Skoðum síðan hvaða aðgerðir muni uppfylla þessi markmið. Í skýrslunni segir:

Nauðsynlegt er að markmið aðgerða séu skýr. Flestir ættu að geta sammælst um eftirfarandi markmið:

• Fólk hafi þak yfir höfuðið.
• Skuldsett fólk nái endum saman.
• Byrðum dreift á sanngjarnan hátt.
• Aðgerðir skilvirkar, áhrifa gæti fljótt.
• Umsýslukostnaður sé sem minnstur.

Við mat á aðgerðum er jafnframt nauðsynlegt að taka tillit til fjölmargra þátta. Meðal annars má nefna:

• Áhrif á efnahagslíf og atvinnustig.
• Áhrif á ríkissjóð í bráð og lengd.
• Áhrif á eigna- og tekjudreifingu landsmanna.
• Áhrif á greiðslubyrði lántaka
• Áhrif á stöðu lífeyrissjóða í bráð og lengd.
• Áhrif á fjárhag Íbúðalánasjóðs.
• Áhrif á fjárhag banka og annarra lánastofnana.
• Áhrif á efnahagslega hvata einstaklinga og lánastofnana.
• Áhrif á framtíðarskipan og fjármögnun íbúðarlána.

Varla er það til of mikils mælst að úrræðin endurspegli þessi markmið og að áhrif ofangreindra þátta séu metin.

Berum nú einstakar hugmyndir sem "sérfræðingahópurinn" var að skoða við markmiðin, þá tryggir sértæk skuldaaðlögun ekki skilvirkni eða að áhrifa gæti fljótt. Hún tryggir heldur ekki að byrðum sé dreift á sanngjarnan hátt, þar sem eingöngu þeir sem eru aftast í veðröð taka á sig byrðarnar. Vissulega munu þeir sem fara í sértæka skuldaaðlögun ná endum saman, a.m.k. í flestum tilfellum. Þó er ákveðinn hópur skilinn útundan.  Úrræðið tryggir ekki að fók haldi húsnæði sínu, en eykur líkurnar á því.

110% leiðin sem einnig var skoðuð af "sérfræðingahópnum" virkar verr en sértæk skuldaaðlögun gagnvart öllum markmiðunum.  Hún nýtist aftur vel tekjuháum fjölskyldum með mikla yfirveðsetningu.

Hækkun vaxtabóta tryggir ekki að fólk haldi húsnæði sínu eða að skuldsett fólk nái endum saman, en eykur líkurnar á hvorutveggja. Hækkun vaxtabóta skorar aftur hátt í hinum þremur markmiðunum.

Leið HH eykur verulega líkurnar á að fólk haldi heimilum sínum, fækkar umtalsvert í hópi þeirra sem ekki ná endum saman, dreifir byrðum á sanngjarnan hátt þar sem allir lánveitendur taka þátt í því og lántaka sitja uppi með um 40% af hækkun lánanna, aðgerðin er skilvirk þar sem ekki skiptir máli hvar lánið er í skuldaröð og umsýslukostnaður er lítill.

Mér sýnist sem aðgerðapakkinn sem Jóhanna hefur talað um í fjölmiðlum "kosti" allt að 174 milljarða miðað við stöðu lána 1.1.2010. Einhver hluti hans fellur undir dóma Hæstaréttar frá því í sumar, en eftir standa örugglega 125 - 135 milljarðar. Þetta veltur þó á tvennu: 1) hvaða áhrif hafa þök á upphæðir og 2) hvað þarf að lokum að afskrifa mikið af biðlánum vegna sértækrar skuldaaðlögunar.  Miðað við núverandi fasteignamat, þá er umframskuldsetning um 125 milljarðar.  Það er þá jafnframt sú upphæð sem er umfram 110% eftir lækkun fasteignamats sem tekur gildi í árslok.  Eitthvað hefur þegar verið afskrifað eða skuldbreytt, en það hefur áhrif inn í leið HH líka.  Yfir 418 milljarðar eru áhvílandi á húsnæði með 60 - 100% skuldsetningu.  Með einfaldri nálgun fæst að rúmlega 100 milljarðar af því eru yfir 60% mörkunum.  Um 2/3 af þeim hópi er með greiðslugetu fyrir skuldunum og færu því ekki í sértæka skuldaaðlögun, en þá eru um 33 milljarðar eftir sem fara á biðlán. Kostnaðurinn er því 125 + 33 = 158 plús hækkun vaxtabóta upp á 16 milljarða á tveimur árum eða alls 174 milljarðar.  Breytt tillaga HH átti að "kosta" á bilinu 129 - 139 ma.kr. allt eftir niðurstöðu varðandi gengistryggð lán.

Það sem ég vil helst vara við, þegar miðað er við fasteignamat eða markaðsverð eigna, er að hvorutveggja verður í lágmarki eða því sem næst í upphafi næsta árs.  Þessi nálgun mun líka kalla á argaþras um hvert er raunvirði eignar og kostnað fyrir alla við að útvega nýtt mat tveggja löggiltra fasteignasala.  Höfum í huga að yfir 40.000 fjölskyldur eru með skuldsetningu yfir 60% af fasteignamati, þar af rúmlega 20.000 með yfir 100% og 20.000 á milli 60-100% (miðað við núverandi fasteignamat).  Það þýðir að tæplega 27.000 fjölskyldur gætu nýtt sér annars vegar höfuðstólslækkun eða sértæka skuldaaðlögun.  Það þýðir að löggiltir fasteignasalar þurfa að verðmeta eignir á bilinu 81-108 þúsund sinnum.  Taki þeir 10.000 kr. fyrir hvert mat er kostnaðurinn 810 - 1.080 milljónir kr.  Taki gerð hvers mats 2 klst. þá tekur það 162-216 þúsund klst. eða 100 - 135 mannár.  Það er útilokað að fasteignasalar komist yfir þetta, svo einfalt er það.  Niðurstaðan er að fólki verður mismunað.  Í flestum tilfellum verður farið eftir fasteignamati, en í öðrum tilfellum verður kallað eftir verðmati löggilts fasteignasala.  Ég sé svo sem heldur ekki fyrir mér að fjármálafyrirtækin nái að sinna málum hátt í 27.000 fjölskyldna, þar sem hvert mál er skoðað sérstaklega.

Ræðst á næsta sólarhring

Sök bítur sekan - Nokkrar spurningar sem fróðlegt væri að fá svör við

Mér finnst að eigendur og stjórnendur Skipta verði að svara nokkrum spurningum:

1. Hver þarf að afskrifa þessa 75 milljarða, ef af afskrift verður?
2. Hverjum datt í hug að færa 59,3 milljarða sem viðskiptavild?
3. Hver var tilgangurinn með því að færa þessa miklu viðskiptavild?

Mér sýnist þetta með viðskiptavildina vera dæmi um sjúkdóm sem var viðverandi í íslensku viðskiptalífi.  Þegar fyrirtækin sjálf stóðu ekki undir því verði sem menn vildu að þau gerðu, þá var blásið lofti í óefnislegar eignir.  Með þessu var líka hægt að skuldsetja fyrirtækin meira, en rekstur þeirra stendur undir.

Skipta til málsbótar er líklegt a þessir 75 milljarðar séu í erlendri mynt og hafi því hækkað verulega vegna falls krónunnar.  Kaldhæðnin í því er að eigendur Skipta, Exista, bera ekki síst ábyrgð á hruni krónunnar og þar með stökkbreyttri skuldastöðu Skipta.  Segja má að sök bíti sekan.

Þarf að greiða 74 milljarða

Forgangsröðunin á hreinu hjá þessum

Vandinn við niðurskurð er forgangsröðunin.  Flestir vilja komast hjá því að skera niður og því velja að skera niður þjónustu sem þeir telja að veki mikla athygli, ef hún verði slegin af.  Er þetta heldur ljótur leikur. 

Ég er viss um að Sjúkratryggingar geta fundið betri leið en þessa.  Er ekki nóg að foreldrarnir séu í þeirri stöðu að vera bundnir yfir langveikum og fötluðum börnum sínum nær allan sólarhringinn, þó ekki sé verið að svipta þá þeirri aðstoð sem þeir þó fá.  Er ég viss um að hægt er að finna einhverja aðra leið til að spara.  Það er ekki mitt að koma með hugmyndir, en ég treysti starfsfólki Sjúkratrygginga til að finna leið sem bitnar minna á þeim sem eru í mestum vanda fyrir.

Ætla að hætta að greiða Heimahjúkrun barna

"Snillingarnir" voru í yfirhylmingu

Hann er áhugaverður punkturinn sem kemur fram í máli Herdísa Hallmarsdóttur:

..slitastjórnin telji meðal annars að skráning bankans á eigin hlutum hafi verið röng, og þar með hafi opinberar tölur um eiginfjárhlutfall bankans verið rangar. Jafnvel hafi eiginfjárhlutfall bankans verið komið langt niður fyrir lögbundin mörk löngu áður en bankinn hafi fallið.

Þetta kemur mér svo sem ekkert á óvart, enda haldið því fram í þó nokkurn tíma að Landsbanki Íslands hafi orðið ógreiðslufær um leið og gengi krónunnar tók að lækka haustið 2007 og ef ekki strax þá, þá alveg örugglega eftir að það hrundi í mars 2008.  Í mínum huga gengur það ekki upp, að bankinn hafi yfirfyllt gjaldeyrismarkað af pundum og evrum af Icesave-reikningum meðan gengið var sterkt og að hann hafi átt nægt fé til að kaupa pundin og evrurnar til baka eftir að gengið féll um nærri 30% frá miðju ári 2007 til marsloka 2008.  Á þessu tímabili hlýtur líka að hafa hallað verulega á eiginfjárstöðu bankans.

Telja endurskoðendur bótaskylda

Öllum brögðum beitt

Nú væri fróðlegt að vita hverjir voru svona svakalega heppnir að losna við hlutabréf sem urðu verðlaus nokkrum dögum síðar og skuldabréf sem féllu niður í ekki neitt í virði.  Hugsanlega hefur ekkert grunsamlegt átt sér stað, en einhvern veginn grunar mig að einhver í innsta hring hafi notið góðs af þessu.

Ekki á ég von á því að þessi peningar fáist til baka frekar en neitt annað sem tekið var út úr bönkunum með vafasömum hætti.  Afskriftir upp á milljarða tugi hjá fólki og fyrirtækjum í elítunni, meðan almenningur fær að éta það sem úti frýs til viðbótar við að greiða niður 1.350 milljarða skuldir ríkissjóðs.  Ég verð að viðurkenna að mér verður alltaf illt í maganum, þegar ég les svona fréttir.

Keyptu eigin bréf fyrir hrun