Piparúða beitt á fólk sem er að hörfa!

Ég er að horfa á útsendingu sjónvarpsins og þar sést lögreglan úða á fólk sem er að labba í burtu.  Hver er tilgangurinn að úða á fólk sem er að hörfa?  Getur einhver útskýrt það fyrir mér.  Getur lögreglan ekki skilið að hópur kemst ekki eins hratt aftur á bak og einstaklingar.  Furðuleg uppákoma.

Af hverju notar lögreglan ekki hátalakerfi til að koma boðum til fólks?  Orð lögreglumanna heyrast nú varla vel í öllum þessum hávaða.

Þetta á eftir að enda með ósköpum.

Piparúða beitt við þinghúsið

Athugasemdir

[corvus corax, 20.1.2009 kl. 18:28]

Tilgangurinn með því að úða á fólk sem er að hörfa er enginn en persónulegur sadismi skítmenna í hópi lögreglunnar þarf greinilega að fá útrás. Lögreglan notaði gjallarhorn til að koma skilaboðum til mótmælenda en það dugði skammt þar sem hávaðinn var gífurlegur af potta-, pönnu- og trommuslætti. Ég var á staðnum í allan dag og get ekki séð að nokkurn tíma hafi verið ástæða til að beita piparúða.

[Andri Valur (IP-tala skráð) 21.1.2009 kl. 15:33]

Ég var líka á staðnum í allan gærdag, í fremstu víglínu. Það fór aldrei á milli mála þegar lögreglan var í þann mund að fara að sprauta gasi. Það vissu allir sem vildu vita þegar slíkt var í bígerð. Ég vorkenni engum sem fékk gusu í andlitið því vissu alveg hvað var að fara að gerast. (sjálfur fékk ég gusu í hnakkann þar sem ég var nógu snöggur að setja upp hettu og snúa mér við).

Fannst lögreglan bara standa sig með prýði, sem og mótmælendur.

[Marinó G. Njálsson, 21.1.2009 kl. 16:17]

Andri Valur, það er gott að ekki var alls staðar gengið of langt. Frásagnir mjög margra benda samt til þess að svo hafi verið.  Auk þess mátti sjá í útsendingu RÚV að vinnubrögð lögreglu hefðu mátt vera betri.

[Andri Valur (IP-tala skráð) 21.1.2009 kl. 18:17]

Ég get náttúrlega ekki fullyrt um hvert einstaka tilfelli sem átti sér stað þarna í gær. Mér finnst það samt vera svolítið gegnum gangandi hjá mótmælendum að saka lögregluna um harðræði eða með öðrum orðum "væla".

Margir hverjir eru, að því er virðist, aðallega þarna til að ögra lögreglunni, eins og hún sé einhver holdgervingur ástandsins. Flestir mótmælendurnir finnst mér samt halda sig réttu megin við línuna.

Sem dæmi má nefna að það var einn mótmælandi sem ég sá kasta glerflösku inn í hóp lögreglunnar, skömmu síðar voru einhver átök þar sem hann fékk óblíðar móttökur. Það þótti þessari sömu manneskju alveg fyrir neðan allar hellur að lögreglan skyldi ekki taka sig einhverjum silkihönskum.

Svo það sé alveg á hreinu þá fannst mér svona 95% af því sem var gert í gær í góðu lagi. Fínt að kveikja í nokkrum bekkjum og jólatréinu osfrv. En þegar einstakir menn stilla sér upp fyrir framan lögregluna til að ögra henni, kalla þá öllum illum nöfnum, blanda fjölskyldu þeirra inn í málin og með svo ljótt málfar að internetið hreinlega þolir það tæplegast:) þá finnst mér menn komnir yfir strikið og vorkenni þeim ekki hót að fá dangl frá kylfu eða piparúða í augun.

Ég hlusta heldur ekki á að einhverjir saklausir hafi orðið fyrir barðinu á lögreglunni því eins og ég upplifði þetta í fremstu víglínu, eins og ég sagði hér að ofan, þá var alveg hægt að komast hjá slíku með því að sýna hæfilega skynsemi og hlýða lögreglunni að einhverju leyti. (Þá er ég alls ekki að tala um að fara bara heim eða í burtu af því lögreglan vildi það - einungis að gefa eftir nokkra metra þegar lögreglan fór framar).