Furðuleg styrkleikaröðun hjá UEFA

Hún er ansi hreint furðuleg styrkleikaröðunin hjá UEFA.  Ég átti mig alveg á því hvernig hún er fengin út, en með ólíkindum er að þýsku meistararnir eru í fjórða styrkleikaflokki, liðið sem lenti í 2. sæti er í þriðja styrkleikaflokki, en liðið sem varð þriðja í vor og fór í gegn um forkeppni er í fyrsta styrkleikaflokki.  Frönsku meistararnir raðast í 3. flokk, liðið sem lenti í 2. sæti rétt mer það að vera í 2. flokki og Lyon sem lenti í 3. sæti og fór í gegn um forkeppni er einnig í 2. flokki.  Þá eru ítölsku meistararnir í 2. flokki meðan liðið sem varð í 2. sæti er í efsta flokki.  Rússnesku meistararnir raðast einum flokk fyrir neðan liðið sem varð í 2. sæti.

Ætli einhver velkist í vafa um að Borussia Dortmund er mun öflugra lið en Basel, Olympiacos og BATE og alveg örugglega ekkert síðra en Arsenal, Porto, Lyon, Valencia, Benfica, Villareal, CSKA Moskva, Marseille, Ajax og Bayer 04 Leverkusen.  Samt raðast þýsku meistararnir allt að þremur flokkum neðar en sum af þessum liðum.

Þessi styrkleikaröðun er aftur ávísun á mjög áhugaverða möguleika þegar dregið verður í riðla.  Helst er að Bayern Munchen njóti þess að sterk þýsk lið eru röðuð neðarlega, þar sem með því kemst liðið hjá því að leika við langsterkasta liðið í 4. flokki.  Sterkasti mögulegi riðillinn sem mér sýnist geta komið út úr drættinum á morugn væri:

Barcelona eða Real Madrid/AC Milan/Manchester City/Borussia Dortmund

Önnur skemmtileg samsetning væri Man. Utd., AC Milan, Lille og  Dortmund.  Tveir veikir riðlar væru:

Porto/Villareal/Basel/APOEL

Arsenal/CSKA Moskva/Olympiacos/Genk

Eins og styrkleikaröðunin er, þá eru nokkur lið úr neðri flokkunum ekkert síðri en lökustu liðin úr efri flokkunum og þá nefni ég úr neðri flokkunum Dortmund, Man City, Napoli, Dinamo Zagreb, Lille, Zenit og Leverkusen, meðan Porto, Arsenal, Benfica, Lyon, Villareal og CSKA hafa oft verið sterkari en um þessar mundir og eiga því líklegast ekki inni fyrir hárri röðun sinni.