Flottu Símamóti Breiðabliks lokið

Í dag lauk ákaflega vel heppnuðu Símamóti Breiðabliks.  Mótið er fyrir stúlkur í 5., 6. og 7. fl. kvenna og hefur það verið haldið í meira en aldarfjórðung.  Í upphafi tóku líka þátt eldri stúlkur, en síðustu tvö skipti hafa flokkarnir verið þrír.

164 lið frá 29 félögum tóku þátt og sendur yfir 1.400 þátttakendur.  Á síðustu þremur dögum hafa farið fram 665 leikir á 18 völlum á íþróttasvæði Kópavogs við Smárann.  Var stemmningin frábær enda lék veðrið við keppendur.  Var svo heitt, að brögð voru að því, að leikmenn öfunduðu þær stúlkur sem fengu öðru hvoru að leika innandyra í Fífunni!

Verðlaunahafa mótsins voru sem hér segir:

Verðlaunahafar

5. flokkur A
Gull: KA
Silfur: Valur
Brons: Stjarnan

5. flokkur B
Gull: Valur
Silfur: Fylkir
Brons: Breiðablik

5. flokkur C
Gull: Valur
Silfur: Breiðablik
Brons: KA og Fylkir

5. flokkur D
Gull: Víkingur
Silfur: KA
Brons: Fylkir

Háttvísiverðlaun 5. flokks: Fjarðabyggð/Álftanes

6. flokkur A
Gull: Haukar
Silfur: ÍR
Brons: Breiðablik

6. flokkur B
Gull: FH 
Silfur: Stjarnan
Brons: Breiðablik

6. flokkur C
Gull: FH 1
Silfur: Fylkir
Brons: Víkingur og Stjarnan

6. flokkur D
Gull: ÍA
Silfur: Breiðablik 1
Brons: Fylkir og Víkingur

Háttvísiverðlaun 6. flokks: Grótta

7. flokkur SA - A-úrslit
Gull: Grindavík 1 og Breiðablik 1
Brons: Víkingur 1 og ÍBV

7. flokkur SB - B-úrslit
Gull: Álftanes og Valur 2
Brons: KR og FH 2

7. flokkur C - A-úrslit
Gull: Reynir og Haukar 1
Brons: Haukar 2 og Grindavík

7. flokkur C - B-úrslit
Gull: ÍA og Valur
Brons: FH og Álftanes

Háttvísiverðlaun 7. flokks: Breiðablik

(Tekið skal fram að þetta var í fyrsta sinn sem við skipuleggjendur mótsins voguðum okkur að veita Breiðablik háttvísisverðlaun, þá flokkar félagsins hafi oft verðskuldað það áður.)

Ég hef undanfarin ár verið í mótsstjórn og er það sem sagt skýringin á því að ég verið "off-line" síðustu daga.  Svo merkilegt sem það er, þá eiga fæstir okkar í mótsstjórn stúlkur sem leika fótbolta.  Þrátt fyrir það er þriðja helgin í júlí ár hvert eyrnamerkt þessu móti, með öllum þeim undirbúningi sem þessu fylgir.  Sýnir það bara hve skemmtilegt starf það er að standa að svona móti.  Ekki skemmir það, þegar samningar við veðurguðina ganga svona vel upp, eins og hefur gerst þrjú af síðustu fjórum árum. 

Hápunktur mótsins er leikur "landsliðs" og "pressuliðs", sem fór fram seinni hluta laugardags á aðalleikvanginum.  Þar kepptu stúlkur úr 5. flokki fyrir troðfullri stúku.  Var stemmningin stórkostleg og leikmönnum fagnað gríðarlega vel.  Hver veit nema meðal þessara stúlkna leyndist framtíðar landsliðskonur.  A.m.k. er vitað að í gegn um tíðina hafa margar núverandi og fyrrverandi landsliðskonur keppt við góðan orðstír.  Um kvöldið kom töframaður í heimsókn, Solla stirða og svo Ingó í Veðurguðunum, sem heillaði allar stelpurnar upp úr skónum frá tveggja ára og upp úr.  Sáust margar ömmur dilla sér undir söngi hans.

Oft var stutt á milli hláturs og gráturs, enda var stefnan sett hátt.  Mörg óvænt úrslit litu dagsins ljós, sérstaklega í útsláttarhluta mótsins.  Einnig varð spilastokkurinn örlagavaldur margra liða, þegar ýmist þurfti að skera úr um röð liða í riðlum eða úrslit leikja, þegar ekki tókst að fá úrslit í venjulegum leika og framlengingu.  Meðan eitt lið fagnaði gríðarlega, þá féllu tár úr augum annarra.

Í ár var í fimmta sinn sem ég sá um röðun mótsins.  Á þeim tíma hefur orðið talsverð breyting á mótinu.  2006 tóku t.d. bæði 3. fl. og 4. fl. þátt í mótinu og keppt var bara í A og B-liðum í öllum flokkum nema 5. fl., þar sem einnig voru C-lið.  Núna voru A, B, C og D lið í bæði 5. og 6. fl. og A, B og C-lið í 7. fl.  Yngstu keppendur eru því ennþá í leikskóla.

Í lokin langar mig að þakka öllum sem lögðu leið sína í Kópavogsdalinn á síðustu dögum fyrir komuna og vonandi koma sem flestir að ári.

Athugasemdir

[Hólmfríður Bjarnadóttir, 19.7.2010 kl. 01:47]

Sæll Marinó

Ég á eina ömmustelpu sem var á mótinu. Hún heitir Ásrún Jónatansdóttir og er fædd 1998. Hún spilar með ÍA.

Daman er reyndar að flytja til Noregs en brottför móður hennar og bræðra varð að dagsetja  EFTIR  SÍMAMÓTIÐ.

Gott að mótið tókst vel og enn betra að veðrið var frábært.

[Björn I (IP-tala skráð) 19.7.2010 kl. 07:32]

Það er svo merkilegt að þarna voru 1.400 stelpur að keppa.  Þarna mættu foreldrar með börnum sínum, ömmur, afar, frændur, frænkur, hundar og kettir.  Ætli það hafi ekki um 4-5.000 manns í allt komið á þetta mót.

Og ekki orð um það í prentmiðlunum og ekki dettur sportsíðunum í hug að fjalla um það.

[Björn I (IP-tala skráð) 19.7.2010 kl. 09:51]

Jæja.  Nú þarf ég að éta ofan í mig fyrra svar að hluta, þar sem Fréttablaðið birti í dag heila síðu af símamótsumfjöllun og myndum af KA.

[Guðmundur Ásgeirsson, 20.7.2010 kl. 03:03]

Takk fyrir æðislega helgi! Og ekki skemmdi afraksturinn: bronsverðlaun í farteskinu. Ég verð nú að segja að allt skipulag mótsins var til fyrirmyndar og eiga allir sem að því stóðu mikinn heiður skilinn.

Okkar lið átti nokkra leiki inni í Fífunni, og það var talsverður léttir að komast í smá skjól frá steikjandi verðurblíðunni.