Hagsmunasamtök heimilanna

 

Ég vil minna fólk á að skrá sig í Hagsmunasamtök heimilanna.  Við erum þegar farin að ná athygli ráðamanna og þeir vilja tala við okkur.  Næstkomandi laugardag, 24. janúar, milli kl. 11 og 13 verður opinn vinnufundur í Borgartúni 3.  Á fundinum verður rætt um verðtryggð lán, gjaldeyrislán (myntkörfu) og lagabreytingar.  Allir eru velkomnir.

Hjálpið okkur að standa vörð um heimilin sem grunnstoð samfélagsins.  Sendið okkur erindi og uppástungur á [e-mail].  Takið þátt í að móta kröfur til stjórnvalda og tillögur um það hvernig bæta má hag heimilanna og koma þeim út úr þeim ógöngum sem mikil verðbólga, háir stýrivextir og hrun krónunnar hafa orsakað.  Allt of mörg heimili líða fyrir þetta, þó sem betur fer það eigi ekki við öll heimilin í landinu.

Athugasemdir

[Hólmfríður Bjarnadóttir, 23.1.2009 kl. 01:31]

Gott að heyra að ráðamenn hafi tekið eftir ykkur/okkur. Þau eru auðvitað ánægð ástjórnarheimilinu að fá faglega aðstoð. Hvet fólk að ganga til liðs

[Þórarinn (IP-tala skráð) 23.1.2009 kl. 10:29]

Varðandi tillögur vegna aðgerða sem stjórnvöld hafa, eða hafa ekki gripið til, þá maður heyrt marga kvarta yfir því hversu verðtryggð lán hafa hækkað í kjölfar bankahrunsins. Félagsmálaráðherra brást við þessu með lögum 133/2008 (greiðslujöfnun) sem manni finnst þó ekki vera nein alvöru lausn heldur frekar það að vandanum sé velt á undan sér. Maður hefur séð þær tillögur víða að réttlátast væri ef vísitöluútreikningurinn væri niðurfærður eins vísitalan var fyrir hrunið, auk þess sem grundvelli vísitölunnar væri breytt. Af hverju ætti t.d. almenningur að þurfa að líða fyrir svona kerfishrun sem verður að telja hæpið að hafi verið tilgangur laganna um verðtryggingu á sínum tíma ? Gegn þessu hafa heyrst raddir sem segja að það væri það vitlausast sem hægt væri að gera hrófla við vísitölunni á einn eða annan hátt, lífeyrissjóðirnir eigi svo mikið af verðtryggðum eignum o.s.frv.

Ég verð að segja fyrir mitt leyti að þá sakna ég þess að hafa ekki séð neitt á opinberum vettvangi frá stjórnvöldum alvöru úttekt á áhrifum slíkra breytinga í tölum og orðum á þjóðarbúið, ef áhrifin yrðu jafn drastískt og sumir vilja meina. Var fjallað um þetta með konkret hætti í vinnu nefndarinnar sem Félagsmálaráðherra skipaði, hvers vinna varð svo að lögum 133/2008?  Ef svo er hefur skýrsla nefndarinnar verið gerð opinber ? Mér finnst það vera lágmarkskrafa að ef e-h slíkar aðgerðir stefna þjóðarbúinu í voða að það sé þá útskýrt skilmerkilega af hverju og í hverju það felist nákvæmlega.

[Marinó G. Njálsson, 23.1.2009 kl. 14:41]

Þórainn, ég hef skrifað um þessi mál frá því áður en bankarnir hrundu og má finna tengla í þau skrif mín hér hægra megin.  Í þessum skrifum mínum er að finna nokkrar tillögur, sem ég tel að sé ekki bara skynsamlegt að grípa til, heldur brýnt.  Ég tel, t.d., að skynsamlegt sé að taka hluta af höfuðstóli lána og setja á afskriftarreikning.  Mín tillaga er að miðað sé við gengi og vísitölu 1. janúar 2008, þ.e. áður en hamfarirnar hófust.  Ég tel líka mikilvægt að setja þak á vexti og verðbætur, þannig að skuldari beri ekki einn ábyrgð á efnahagsþróuninni.  Loks hef ég lagt til að ríkið taki yfir hluta allra veðlána heimilanna (t.d. það sem fer á afskriftarreikning) í staðinn fyrir að kaupa bankaskuldabréfin af Seðlabankanum.  Þetta er allt útlistað í hinum og þessum færslum sem tengt er við hér til hliðar.