Það er vont en það venst

Hækkun vísitölu neysluverðs er heldur meiri en ég spáði í bloggi hér fyrir hálfum mánuði (sjá Það er verðbólgan að baki sem er mesta vandamálið).  Þá spáði ég 1,1 - 1,4% hækkun milli mánaða, en síðan hækkaði ríkisstjórnin ýmsar álögur á áfengi, tóbak, bensín og olíu, sem taldar voru hafa áhrif upp á 0,5%.  Muna ekki allir eftir því, að forsætisráðherra sagði að þær hækkanir hefðu ekki áhrif á verðbólgu! (sjá Forsætisráðherra fer ekki með rétt mál og Ályktunargáfa sem á sér ekki sinn líka).

En þetta á eftir að versna áður en það byrjar að batna.  Samkvæmt töflu á vef Hagstofunnar, þá var hækkun vísitölu neysluverð 0,2% milli desember 2007 og janúar 2008.  Til þess að verðbólgan verði lægri í næsta mánuði, þá þarf hækkunin milli desember 2008 og janúar 2009 að vera undir 0,2%.  Verður það að teljast ákaflega ólíklegt.  Taflan sýnir áhrif mismunandi hækkunar á vísitölu neysluverðs milli desember og janúar á verðbólgutölur í janúar.

 

Hækkun milli des. og jan.	Verðbólga í jan.
0,3%	18,3%
0,6%	18,6%
0,9%	19,0%
1,2%	19,3%
1,5%	19,7%

Verðbólgan mælist 18,1%

Athugasemdir

[Einar Vilhjálmsson (IP-tala skráð) 22.12.2008 kl. 14:50]

Takk fyrir þetta Marimó

Eru spár um verðbólgu sem komið hafa fram  að miðast við neyslukörfu landsmanna á árunum 2006 0g 2007 ?  Eitthvað segir mér að spár til þessa grundvallist á eldri neyslukörfu. Og að eftir áramót blasi við óupplýst staða - verri staða. Vonandi rangt.

[Marinó G. Njálsson, 22.12.2008 kl. 14:59]

Miðað er við neyslukönnun sem gildir fyrir 3 ár.  Síðasta árið er árið sem lauk 12 mánuðum áður en árið sem á í hlut byrjaði, þ.e. 2004-2006 vegna 2008, 2003-2005 vegna 2007 o.s.frv.  Það er náttúrulega vonlaust að vera með nýliðið ár í tölunum fyrir janúar, hvað þá nýliðinn mánuð fyrir tölur í desember.  Auðvitað er þetta ekki nákvæmt, en er einhver með betri tillögu?

[Marinó G. Njálsson, 22.12.2008 kl. 19:16]

Ég get ekki annað en furðað mig á ummælum Geirs H. Haarde áðan í Ísland í dag.  Þar sagði hann telja að verðbólgumælingin sem birt var í dag verði toppurinn.  Þetta er alveg arfavitlaus yfirlýsing, þar sem verðbólga núna á milli mánaða mældist 1,52%.  Til þess að verðbólgutoppnum hafi verið náð þarf verðbólga milli desember og janúar að vera undir 0,2%, sem er sú mæling sem fellur út í næstu ársverðbólgumælingu.  Ég held ég geti fullyrt að aldrei hafi orðið slík lækkun verðbólgu milli mánaða, þ.e. úr 1,52% niður fyrir 0,2%.  Það er því nokkurn veginn 100% öruggt að verðbólgan í janúar verður meiri en hún er núna.  Þetta er því miður enn eitt dæmi um að Geir er ekki að fylgjast með.

[Einar Vilhjálmsson, 23.12.2008 kl. 02:47]

Svona fyrir jólin eigum við samt ekki að standa með tilgátu Geirs í von um að verðbólgan í nóvember endurspegli veikasta meðalgengi krónu í stórum innflutningsmánuði. Þannig má ætla að ýmiss varningur hafi hækkað meira í nóvember en annars hefði orðið. Og að með styrkingu krónunnar í desember sé líklegra að margir vöruflokkar hækki ekki í janúar, auk þess sem að enn frekari útsölur hjálpa til þá - gef þessu 51/49.