Er dómsmálaráðherra að hvetja til lögbrota!

Ég verð að viðurkenna, að ég átta mig ekki alltaf á dómsmálaráðherra þjóðarinnar.  Hann heldur úti vefsíðu, þar sem hann tjáir sig sem einstaklingurinn Björn Bjarnason.  Með þessu þá vill hann gera greinarmun á einstaklingnum Birni Bjarnasyni og dómsmálaráðherranum Birni Bjarnasyni.  Eins og margt annað í þessu þjóðfélagi, þá yrði þetta hvergi annars staðar liðið. 

Nú ætla ég ekki að takmarka tjáningarfrelsi Björns á nokkurn hátt, en mér finnst mikilvægt að hann greini á milli almennrar stjórnmálaumræðu og skoðun sinni á málefnum sem ekki falla undir ráðuneyti sitt og þeirra atriða sem falla undir ráðuneytið.  Mér finnst, td., ekki viðeigandi að hann tjái sig um að brot á lögum séu sjálfsögð.  Hann getur alveg haft skoðun á því að breyta eigi þessum ákvæðum í þeirri rannsókn sem fara mun fram, en að hann réttlæti lögbrotin finnst mér ekki hæfa dómsmálaráðherra þjóðarinnar.

Björn: Fjölmiðlar marklausir við núverandi aðstæður

Athugasemdir

[Einar Þór Strand, 23.11.2008 kl. 21:42]

Marinó finnst þér í alvöru að það eigi ekki að aflétta bankaleynd?

Finnst þér í lagi að örfáir menn sem settu þjóðina á hausinn viðskiptum sínum eigi að njóta verndar?

[Marinó G. Njálsson, 23.11.2008 kl. 21:56]

Einar Þór, þú mátt ekki tengja saman skoðun minni á því hvort létta eigi bankaleynd og því sem ég er að benda á.  Sem stendur eru í gildi lög um bankaleynd.  Þar til að sett eru sérlög um þessi mál þar sem bankaleyndinni er aflétt, þá eru þau í gildi.  Ég vil að við förum að lögum.  Bæði núna og síðar.  Ég vil að sett verði lög um whistleblowers, sem gerir fólki kleift að koma fram og greina frá atriðum sem stangast á við lög, þó svo að með því sé fólk að brjóta önnur lög.  Ég vil að sett verði sérlög um rannsóknina á falli bankanna, falli hagkerfisins, framkvæmd peningamálastefnunnar og fleira þessu tengt. En þar til slík lög verða sett, þá gilda lög um bankaleynd hvort sem okkur líkar það betur eða verr.

[Einar Þór Strand, 23.11.2008 kl. 22:06]

Get fallist á það en með þá handónýtu þingmenn sem sitja á Alþingi þá verða þessi lög seinnt sett og ekki stefnir í það að nokkur flokkur muni skipta út öllum þeim sem eru í framboði þannig.

[Marinó G. Njálsson, 23.11.2008 kl. 22:22]

Það vill svo til að Björn Bjarnason lýsti því yfir í Kastljósviðtali 6. nóvember að huga þyrfti að setningu laga/reglna um blístrara (whistleblowers).  Nú verðum við bara að sjá hversu langt sú vinna er komin.

[Magnús V. Skúlason, 23.11.2008 kl. 23:28]

Mér finnst það bara ekki hæfa að hafa upphrópunarmerki í þessari fyrirsögn.

[Marinó G. Njálsson, 23.11.2008 kl. 23:34]

Upphrópun eða spurningarmerki.  Skiptir það máli?