Weasley klukkan fyrir Mugga

Eitt af mörgum undrum í Harry Potter bókunum var klukka sem var upp á vegg hjá Weasley fjölskyldunni.  Klukkan var þeirrar náttúru að hún sýndi hvar hver og einn fjölskyldumeðlimur var staddur á hverjum tíma. 

Í rúm 2 ár hefur verið talað um að Microsoft væri að þróa nokkurs konar Weasley klukku og nú mun hún vera orðin að veruleika.  Fregnir herma að fyrirtækið sé að hefja prófanir á forriti og vefþjónustu sem leyfir fjölskyldumeðlimum að skrá stöðu sína á hverjum tíma.  Forritið birtir svo staðsetningu þeirra á skjá heima hjá viðkomandi.  Með því að keyra lítil forrit upp á t.d. farsíma, þá sendir farsíminn stöðu sína til vefþjónustu sem síðan áframsendir hana til heimilistölvunnar.  Staðsetning er reiknuð út frá hnitum næsta farsímasendis.  Við komu á vinnustað eða skóla eru slegin inn skilaboð í símann sem segir að viðkomandi sé kominn á sinn stað og hættir þá forritið að senda staðsetningarskilaboð.

Nú er bara spurningin hvort fólk vilji fá sér svona Weasley-klukku eða hvort fólk vilji bíða eftir því að töfraklukkan fáist. 

Athugasemdir

[Svanur Gísli Þorkelsson, 8.4.2008 kl. 23:26]

Svo átti Potter líka kort af skólanum sínum sem gerði nákvæmlega það sama fyrir alla sem á svæðinu voru. (Vá frumleikinn er yfirþyrmandi) Svo eiga USA og fleiri lönd augu upp á himninum sem gera þetta sama fyrir NSA og CIA, Mosat, KRP, og allar aðrar skammstafaðar stofnanir sem gera líf okkar SVO öruggt :)