Hvenær verður drengur að pilti?

Á dv.is er frétt um leit að 19 ára gömlum pilti sem hvarf á nýársnótt.  Ákaflega sorglegt og vonandi hefur hann bara fengið húsaskjól og gleymt að láta vita af sér.

Það er ekki hvarf hans sem vekur mig til umhugsunar, heldur orðaval blaðamanns sem vísar til einstaklingsins sem "drengs" enda er fréttin undir fyrirsögninni "Drengurinn enn ófundinn".  Í okkar ágæta máli eru til nokkur orð sem lýsa einstaklingi af karlkyni og hafa hingað til verið notuð til að endurspegla aldur viðkomandi.  Þannig höfum við í aldursröð hnokka, stráka, drengi, sveina og pilta.  Ég veit ekki hvort það er tilhneiging hjá fólki eftir því sem það eldist að brengla þessari röð eða bara að tilfinning fyrir málinu er að hverfa.  Í mínum huga er 19 ára karlmaður ekki drengur (nema kannski þegar verið er að lýsi hreysti hans), hann er varla sveinn, en piltur er hann örugglega og svo sannarlega ungur karlmaður.

Hjá kvenþjóðinni er síðan talað um tátur, telpur, stelpur, meyjar og stúlkur.  Sundmenn tala að vísu um hnátur sem 10-11 ára telpur, en samkvæmt íslenskri orðabók er hnáta ,,þéttvaxin (lágvaxin) ung stúlka".

Í sama dúr er einnig oft talað um ungmenni sem fólk á þrítugsaldri og unglinga allt undir tvítugt.  Mér hefur fundist þetta öfug snúið, þar sem ég hef vanist því að unglingar séu þeir sem eru í unglingadeildum grunnskóla eða í gagnfræðaskóla áður fyrr, en ungmenni sem voru komin í framhaldsskóla.  Í knattspyrnu tilheyra að vísu 23 ára landsliðin "ungmennalandsliðum", en að teygja sig ofar finnst mér nú verið að ganga of langt.

En ég vona innilega að pilturinn finnist heill á húfi. 

 

Athugasemdir

[Kristján Sigurður Kristjánsson, 2.1.2008 kl. 21:44]

Ég rek augun í nokkra Háskólagengnahortitti í þessari málvöndunargrein:

"einstaklings, lýsa einstaklingi, endurspegla, Þannig höfum við...., tilhneiging"

Það er gott að haltur leiði blindan en ef að blindur leiði blindan er hætt við að þeir lendi í pytti.

Lifðu heill.

[Marinó G. Njálsson, 2.1.2008 kl. 22:31]

Og punkturinn hjá þér, Kristján, var?

[Kristján Sigurður Kristjánsson, 3.1.2008 kl. 00:00]

[Marinó G. Njálsson, 3.1.2008 kl. 10:14]

Það er sorglegt að vita til þess að pilturinn fannst látinn.  Votta ég aðstandendum hans samúð mína.