Fölsun upplýsinga heldur áfram

Ég er búinn að vekja athygli á þessu áður og sé mig knúinn til að endurtaka það hér:

Fjármálafyrirtækin sendu rangar upplýsingar til ríkisskattstjóra um stöðu áður gengistryggðra lána heimilanna vegna framtals þess árs.  Lánin voru ennþá reiknuð sem gengistryggð þrátt fyrir dóma Hæstaréttar frá 16. júní 2010.  Er alveg með ólíkindum að skattstjóri hafi ekki brugðist við ítrekuðum ábendingum mínum til hans um þetta efni.  Skil ég ekki hvers vegna rangar tölur eru látnar standa.

Samkvæmt útreikningu Fjármálaeftirlitsins þá námu áhrifin af dómum Hæstaréttar vel á annað hundrað milljarða sem eftirstöðvar lána einstaklinga lækkuðu.  Í gagnaskilum til ríkisskattstjóra ákváðu fjármálafyrirtækin að virða að vettugi dómana, eins og þeir hefðu aldrei fallið.  Og þrátt fyrir endurteknar ábendingar mínar, þá lætur ríkisskattstjóri (að því virðist) eins og ekkert sé.  Er það grafalvarlegur hlutur, þar sem það varðar við sektum og jafnvel þyngri refsingu að gefa upp rangar upplýsingar á skattframtölum.  En ekki fyrir fjármálafyrirtækin.  Þau virðast geta sent hvaða bull sem er til skattstjóra og hann tekur við þeim þegjandi og hljóðalaust án minnstu tilraunar til að fá réttar upplýsingar.  Ætli Steingrímur átti sig á því, að með þessu er skattstjóri að lækka skattstofna ríkisins?  Þessi "mistök" fjármálafyrirtækjanna hafa nefnilega áhrif á, svo dæmi sé tekið, auðlegðarskatt.

Nú ratar þessi vitleysa um ranga skuldastöðu heimilanna inn í eitt ritið í viðbót, Peningamál Seðlabanka Íslands.  Þaðan fara tölurnar inn í ótal önnur rit, því Peningamál er eitt af þessum grunnritum sem sífellt er vitað í.  Hvers vegna ríkisskattstjóri lætur fjármálafyrirtækin komast upp með að mata sig á röngum upplýsingum, er mér með öllu óskiljanlegt og er ekki til að auka traust almennings á íslenskri stjórnsýslu.

Dómur dregur úr óvissu

Athugasemdir

[Guðmundur Ásgeirsson, 17.8.2011 kl. 17:09]

Þetta er alls ekkert óskiljanlegt.

Ef þeir myndu gefa réttar upplýsingar kæmi í ljós að nýju bankarnir eru í raun og veru allir gjaldþrota. Við það eru háttsettir aðilar alveg skítlogandi hræddir. Minnugir þess hvað gerðist síðast.

Þetta má því útskýra sem hræðsludrifna meðvirkni.

[Gunnr (IP-tala skráð) 17.8.2011 kl. 18:26]

Klárlega er þetta rétt hjá Guðmunundi, enda eru bankarnir vanfjármagnaðir og lifa "zombíalífi",hvorki lifandi né dauðir sem innheimtustofnanir og eru núna á eignarlega gráu svæði sem innheimtustofnir. Hótfyndni vikunnar var þegar fjármálaráðherra var að tala um að "selja" eignarhlut ríkisins og ég get varla ímyndað mér að slegist verði um þann hluta. Væntanlega verður þetta "sykrað" með braki úr fyrirtækjum landsins sem í raun mörgum er haldið úti af bönkunum. Íslenskt bankabrak er minna virði en skítaklessa og varla er slegist um að lána Íslenskum gjalþrota/hálfgjaldþrota skuldakóngum.

Hvert ætli planið sé að halda uppi íslenska fjármálakerfinu með "blöffi" og verða eins og Bakkabræður bera inn sólskin í fötum.

[Kristján H Theódórsson, 18.8.2011 kl. 12:29]

Sæll Marinó!

 Ég lét mig hafa það að "leiðrétta" uppgefna skuld mína við Frjálsa Fjárfestingabankann skv. mínum útreikningi um löglega reiknaðar eftirstöðvar.  Lét fylgja með skýringar í athugasemdadálki.

Skatturinn hefur ekki gert athugasemd eða breytingar á þessu!

Við þetta varð veruleg breyting á skuldastöðu minni, lækkun höfuðstóls um 2/3, þannig að ef ég var að fara með rangindi hefði skattmann átt að hnippa í mig!