Stjórnvöld skilja ekki vandann

Mér finnst það stórmerkilegt, að þegar Seðlabankinn og Hagstofan eru nýbúin að birta upplýsingar um mjög alvarlega skuldastöðu heimilanna í landinu, þá flýtur ríkisstjórnin sofandi að feigðarósi.  Ég hef haft ávæning um hluta af þeim ráðstöfunum sem stjórnvöld ætla að kynna í þessari viku.  Sumt er gott, en annað hálf furðulegt í ljósi þess, að þar virðist eingöngu verið að bjargar yfirskuldsettum heimilum, en ekki tekið nægilega vel tilliti til greiðslugetu heimilanna.

Í vinnu "sérfræðingahóps" stjórnvalda um daginn, þá kom fram að 17.700 fjölskyldur ráða ekki við útgjöld og/eða afborganir húsnæðislána.  Þá er eftir að taka inn önnur lán, m.a. bílalán.  Tölur Hagstofu og Seðlabanka benda til þess að um 40.000 fjölskyldur nái ekki endum saman um mánaðarmót eða eigi í erfiðleikum með það.

Skuldakreppan sem dynur á þjóðfélaginu, er sú fyrsta í heiminum sem ekki er hægt að lina með verðbólgu.  Alls staðar annars staðar er verðbólga notuð til að hækka laun umfram skuldir, þ.e. lánveitendur eru látnir taka á sig tjón af kreppunni með neikvæðri ávöxtun eða verulega skertri ávöxtun.  Hér kemur verðtryggingin í veg fyrir það.  Bandarísk stjórnvöld hafa ákveðið að prenta fullt af peningum og búa til verðbólgu.  Áströlsk stjórnvöld gáfu hverjum einasta landsmanni 900 ástralska dali til að búa til verðbólgu.  Hérna eykur verðbólga á vandann.

Óttast að upp úr muni sjóða

Athugasemdir

[Gunnar Heiðarsson, 30.11.2010 kl. 23:35]

Getur það verið að ekki megi fara í einhverskonar flata leiðréttingu lána sé vegna þess að þá sé um leið viðurkennt að um leiðréttingu sé að ræða, viðurkenning á því að hér hafi orðið forsendubrestur?

Með því að leggja áherslu á sértækar lausnir er auðveldara að tala um niðurfellingu í stað leiðréttingu. Það leiðir einnig af sér þann hugsanhátt að fólki finnist að það sé verið að færa því einhveja ölmusu sem það á í raun ekki rétt á. Niðurlægingin bætist þá ofaná skuldavandræðin, vandræði sem lántakendur eiga eingan þátt í að skapa.

[Gunnar Ársæll Ársælsson (IP-tala skráð) 1.12.2010 kl. 01:00]

Blessaður Er með spurningu sem tengist afnámi verðtryggingar og eignarréttar ákvæði stjórnarskrár. Er ekki hægt að fara í mál við ríkið vegna afnáms verðtryggingar á persónuafslátt sem er eignarupptaka samkvæmt stjórnarskrá?Er ekki afnám verðtryggingar það samkvæmt stjórnvöldum? Kveðja Gunnar Ársæll Ársælsson

[Hörður Þórðarson, 1.12.2010 kl. 04:14]

"Sumt er gott, en annað hálf furðulegt í ljósi þess, að þar virðist eingöngu verið að bjargar yfirskuldsettum heimilum, en ekki tekið nægilega vel tilliti til greiðslugetu heimilanna."

Ert þú alveg viss um að þú hafir hugsað hugsunina til enda þegar þú skrifaðir þetta? Er ekki einmitt verið að taka tillit til greislugetu heimlianna þegar bjarga á þeim sem eru "yfirskuldsett"? Ef þau eru ekki yfirskuldsett, hvers vegna þarf þá að bjarga þeim?

Það vita flestir Íslendingar hversu mikið skaðræði felst í verðbólgu bálinu. Ég verð að viðurkenna að mér finnst það ábyrgðarlaust að hvetja til þess að það fari af stað aftur.

Ástralía sem þú nefndir er ríkt land og rikið er rekið með afgangi. Ísland er nánast gjaldþrota og sjálfstæði landsins er af þeim ástæðum stefnt í tvísýnu. Vonandi glatast það ekki.

[Guðmundur Jónsson, 1.12.2010 kl. 12:03]

@ Hörður

EF þú þykist ekki geta séð af samhenginu að Marinó er að tala um yfirskuldsett eða veðsett heimili með greiðslugetu og heimil sem eiga ekki fyrir skuldum óháð veðsetningu. hvernig heldurð þá að það sé hægt að taka þig alvarlega í þessari umræðu. ?

[Tryggvi Helgason, 1.12.2010 kl. 13:22]

Hvernig stendur á því að Alþingi tekur ekki föstum tökum að setja lög til þess að afnema vísitölu- og verðtryggingakerfið, og setji jafnframt lög um, að öll lánafyrirtæki verði að endurreikna öll lán, - án vísitölunnar, - frá 1, janúar 2008, og endurgreiði öllum lántakendum mismuninn ?

Það virðast flestir geta skilið þetta, nema ríkisstjórnin og núverandi þingmeirihluti Alþingis, - hvað veldur ?

[Arnór Baldvinsson, 2.12.2010 kl. 03:27]

Hörður,

Hófleg verðbólga er af hinu góða, því hún ýtir undir eyðslu og eyðsla ýtir undir framleiðslu og framleiðni.  Verðhjöðnun veldur stöðnun.  Það er mikill munur á 5% verðbólgu og 50-100% verðbólgu sem ég man eftir á áttunda og níunda áratugnum, sem varð til þess að verðtrygging var komið á flesta hluti.  Það sem gleymdist var að afnema þetta í áföngum þegar verðbólgan minnkaði.  Þetta hangir allt saman.  Án eyðslu geta fyrirtækin ekki staðið undir launum og ef fólk fær ekki laun getur það ekki staðið undir eyðslu.  Með því að auka verðbólgu tímabundið geta stjórnvöld komið hjólum atvinnulífsins af stað.  Þetta er bandaríski seðlabankinn að gera til þess að kynda svolítið undir efnahagsbata, sem mörgum hér finnst vera ansi hægur!

Kveðja,

[Eyjólfur G Svavarsson, 2.12.2010 kl. 16:05]

@Arnþór

Eru íbúðarlán verðtryggð í Bandaríkjunum? Ekki mega heimilin við hóflegri hækkun skulda vegna hóflegrar verðbólgu hér á landi. Eða er ég eitthvað að misskilja þetta?