BA-gráða í klassískum ballett er komin í hús

Ég verð að monta mig aðeins.  Dóttir mín, Sæunn Ýr Marinósdóttir, útskrifaðist sl. fimmtudag með BA-gráðu í klassískum ballett frá einum virtast ballettskóla Evrópu, Ungversku dansakademíunni.   Er hún fyrst íslenskra listdansara til að útskrifast með BA-gráðu, að því að best er vitað.  Áður hefur Sæunn Ýr lokið stúdentsprófi frá Konunglega sænska ballettskólanum í Stokkhólmi vorið 2007. Í ágúst mun Sæunn Ýr síðan fara á samning hjá ballettinum í Dortmund.

Þessu er hún að ná af þrautseigju, þrjósku, einbeitni, þolinmæði og ekki síst af gríðarlegri vinnusemi.  Það hefur of brotið á henni, enda ekki allir kennarar hennar af ungversku bergi brotnu tilbúnir að viðurkenna að Íslendingur sé betri en þeirra fólk.  Þess má geta að af 15 manna útskriftarhóp eru aðeins þrír nemendur komnir á samning.

Ungverska dansakademian (Hungarian Dance Academy; Magyar Táncmüvészeti Föiskola) býður upp á 3 ára BA-nám fyrir nemendur sem vilja sækja nám á háskólastigi.   Samhliða námi hefur Sæunn Ýr komið fram í sýningu hjá ungverska þjóðarballettinum.  Meðal sýninga sem hún hefur tekið þátt í hjá ungverska þjóðarballettinum eru Hnotubrjóturinn, Giselle, Don Quixote, Chopiniana, La Vivandiére, La Bayadere Shades og Carmina Burana.  Hún dansaði í Blómavalsi Hnotubrjótsins í uppfærslu fyrir síðustu jól.  Sýningar hafa ýmist verið hluti af náminu eða í tilfelli La Bayadere Shades uppfærsla, þar sem ungverski þjóðarballettinn óskaði sérstaklega eftir þátttöku hennar.  Var það í fyrsta skiptið sem erlendur nemandi var valinn af ballettinum til að taka þátt í uppfærslu á þessu verki. 

Á námsárunum í Svíþjóð tók hún þátt í uppfærslu Konunglegu sænsku óperunnar á Rómeó og Júlíu og La Fille Mal Gardeé.

Þess má að lokum geta, að árið 2005 hlaut Sæunn Ýr viðurkenningu Kópavogsbæjar sem framúrskarandi ungur listnemi. Var viðurkenningin afhent á 50 ára afmælishátíð bæjarins.  Það var þáverandi skólastjóri Listdansskóla Íslands, Örn Guðmundsson, sem sendi menningamálaráði bæjarins ábendingu um hana. 

Ég áður fjallað um námsferill hennar og má lesa það í færslunni sem ég endurbirti hér fyrir neðan.

Glæsileg ballettdansmey

Dóttir okkar hjóna, Sæunn Ýr Marinósdóttir, er búin að vera í ballettnámi frá 3 ára aldri.  Hún var fyrst hjá Guðbjörgu Björgvins í 2 ár, þá í Ballettskóla Sigríðar Ármann og fór svo í Listdansskóla Íslands þegar hún var 9 ára gömul.  Í Listdansskólanum lauk hún grunnskóladeildinni og tók eitt ár í framhaldsdeildinni.  Þaðan fór hún í Konunglega sænska ballettskólann í Stokkhólm og var þar í þrjú ár.  Sæunn Ýr lauk námi þar með stúdentsprófi vorið 2007.  Í framhaldi af því sótt hún um í Hungarian Dance Academy í Búdapest, Ungverjalandi, og er þar í BA-námi.

 Ballettnám er mjög krefjandi nám og ekki dugar að slá slöku við á sumrin.  Því hefur Sæunn sótt sumarnámskeið á hverju sumri frá 14 ára aldri, þrisvar hjá Konunglega danska ballettinum, tvisvar í Búdapest, einu sinni til New York og núna í sumar æfði hún hjá San Francisco Ballet School með þeim hópi nemenda skólans sem Helgi Tómasson hefur valið til að "berjast" um pláss hjá SF Ballet á komandi vetri.  Í byrjun september hefst síðan nýtt skólaár í Búdapest.

Myndirnar sem fylgja hér með, eru teknar af Sæunni þegar hún tók þátt í keppni, sem haldin var í Búdapest sl. vetur.  Hún komst, ein úr sínum árgangi, í 5 manna úrslit keppninnar en það er frábær árangur.  Aðrir dansarar sem komust í úrslit voru ýmist úr efri árgöngum skólans eða komnir lengra á veg annars staðar.

Myndirnar sýna svo ekki verður um villst, að þarna er á ferðinni glæsileg ballettdansmey eða ballerína, eins og krakkarnir myndu segja.  Sæunn Ýr hefur náð mjög langt í ballettinum, en er samt ekki nema rétt lögð af stað.  Einn af kennurum hennar í Svíþjóð hefur alveg tröllatrú á henni og hefur spáð því að hún eigi eftir að enda feril sinn sem primaballerina hjá góðum dansflokki. 

Það er meira en að segja það, að ná jafn langt og Sæunn hefur gert í klassískum ballett.  Þegar hún sótti um inngöngu í Konunglega sænska ballettskólann, var hún ein af um 250 stúlkum sem teknar voru í inntökupróf.  Prófin hófust á mánudegi og í lok hvers dags var hópurinn skorinn niður.  Á fimmtudagsmorgni stóðu 23 stúlkur eftir og af þeim voru 15 valdar inn.  Af þessum 15 voru 14 sem komu úr hinum fjórum grunnskóladeildum Konunglega sænska ballettskólans og svo Sæunn.  En þar með er ekki sagan búin.  Af þessum 15 luku aðeins 6 námi og útskrifuðust með stúdentspróf vorið 2007 og af þeim leggja tvær ennþá stund á ballett.  Þannig af 250 stúlknahópi sem fór í inntökupróf í febrúar 2004 eru tvær eftir, þ.e. íslenska stelpan, sem ákvað 3 ára að hún ætlaði að verða fræg ballerína, og sænsk bekkjarsystir hennar. Þetta hefur kostað blóð, svita og tár, háar fjárhæðir og miklar fjarvistir frá fjölskyldunni.

Útskrifast úr virtasta ballettskóla Evrópu

Athugasemdir

[Ásdís Rósa Ásgeirsdóttir (IP-tala skráð) 3.7.2010 kl. 14:31]

Glæsilegt hjá henni !! Til hamingju með hana :)

[Edda Karlsdóttir, 3.7.2010 kl. 14:35]

Glæsilegt! Innilega til hamingju, þetta er flott stúlka og þið hafið alveg efni á að vera stoltir foreldrar :)

[Arinbjörn Kúld, 3.7.2010 kl. 15:22]

Til hamingju með snótina Marínó. Þrautseigjuna hefur daman frá þér greinilega.

Kveðja að norðan.

[Óskar Þorkelsson, 3.7.2010 kl. 16:47]

glæsilegur árangur, innilega til hamingju með stúlkuna :)

[Arnór Baldvinsson, 3.7.2010 kl. 18:54]

Til hamingju með dótturina, Marinó!  Frænka mín var að útskrifast með master í alþjóðaviðskiptum og það er gaman að sjá svona ungt og harðduglegt fólk njóta ávaxtanna af erfiði sínu! 

Kveðja,

[Gunnar Skúli Ármannsson, 3.7.2010 kl. 19:14]

TIL HAMINGJU ÖLL SÖMUL!!

Þetta er frábær árangur og öllum fyrirmynd. Ég tek undir með Kúld að þrjóskuna hefur hún frá þér ásamt ýmsu öðru. Vonandi gengur henni allt í haginn í framtíðinni.

[Ólafur Njálsson (IP-tala skráð) 3.7.2010 kl. 21:40]

Til hamingju með dótturina bróðir sæll. 

Já þær eru þrauseigar ömmudæturnar, læknisfræðinám, doktorsnám í sálfræði, doktorsnám í tölfræði, verkfræðinám og flugstjóri, eðalflautuleikari og tilvonandi læknastúdent, ballerína með BA gráðu, enn ein ballerína á uppleið, ein er nýstúdent, ein á eftir að ákveða sig.

Strákarnir tjah!  Einn er master í sálfræði við eitthvað voða spes svið, annar lauk stúdentsprófi á tveimur brautum samtímis, einn er kominn í verkfræðinám, þrír eru ungir og óákveðnir (enn á grunnskólaaldri).

Og svo við fjórir bræðurnir og dömurnar okkar.

Hvað ætli sé hægt að biðja um meira?  Þetta er hamingjan sjálf að börnum og barnabörnum farnist öllum vel.  Ömmur og afar sitja alsæl og horfa yfir hópinn sinn.

Þetta er ekki mont!  

Ég óska öllum þess sama og vona að svo verði alltaf á endanum hjá öllum.  Ef ekki nú, þá í næsta/næstu lífum.

Í hamingjunni skynjar maður eilífðina.

ÓLI

[Jóna Kolbrún Garðarsdóttir, 4.7.2010 kl. 01:37]

Innilega til hamingju með árangur dóttur þinnar, hún er greinilega ósérhlífin og duglegur námsmaður.. 

[Hrannar Baldursson, 4.7.2010 kl. 07:06]

Til hamingju Marinó.

Þú ert lýsandi fyrirmynd um hvernig samfélag ég vil sjá á Íslandi. Það er aðdáunarvert af hversu mikilli þrautseigju þú hefur barist fyrir betri heimi, að fólk átti sig á að heimurinn er ekki það sem stjórnvöld skapa þeim, heldur það sem þau geta gert sjálf með góðum vinnubrögðum.

Þú hefur verið að berjast gegn því að komið sé í veg fyrir að fólk nái árangri í lífinu, að hindranir séu fjarlægðar af veginum til farsældar og hamingju, kannski vegna þess að þú þekkir hversu dýrmæt farsældin er.

Til hamingju með dótturina og vonandi tekst okkur í sameiningu að vernda hreiður allra íslenskra fjölskylda.

[Hólmfríður Bjarnadóttir, 4.7.2010 kl. 12:03]

Hamingjuóskur

[magnús steinar (IP-tala skráð) 4.7.2010 kl. 12:12]

Innilega til hamingju,með stúlkuna Marinó.

[Magga Pé (IP-tala skráð) 4.7.2010 kl. 13:26]

Til hamingju með dótturina Marinó.

[Benedikta E, 4.7.2010 kl. 16:55]

Marinó - Til hamingju með hana dóttur þína - hún er ekkert smá glæsileg - hæfileikarík og dugleg.

Og svo þið foreldrarnir sem eigið ykkar þátt í því að hjálpa henni til að láta draum sinn rætast.

Takk fyrir að segja okkur frá einstakri velgengni Sæunnar Ýr - það er ánægjulegt að heyra.

[Þórður Björn Sigurðsson, 4.7.2010 kl. 16:56]

Hamingjuóskir til ykkar allra.

[Páll Blöndal, 4.7.2010 kl. 21:57]

Frábær árangur hjá stelpunni þinni.
Innilega til hamingju Marinó
Megi henni farnast sem allra best listabrautinni.

[Guðmundur Ásgeirsson, 4.7.2010 kl. 22:37]

Til hamingju með dóttur þína Marinó, þetta er glæsilegur árangur!

Elsta dóttir mín byrjaði í ballet þegar hún var pínulítil en entist ekki lengi, þó hún sé vel gefin þá hefur hún ekki allla þá þolinmæði sem svona nákvæmnislist útheimtir. Það virðist henta henni betur að hlaupa og djöflast enda er hún byrjuð í fótboltanum og líkar það vel! ;)