Meingallað svar fjármálaráðherra og villandi svar Seðlabankans

Ekki þarf mikla stærðfræðisnilld til að átta sig á því að svar ráðherra er meingallað.  Skoðum tölurnar:

Tekjur	Fjöldi
Undir 119.000 kr.	100.000
119.000 - 200.000 kr.	63.000
200.000 - 650.000 kr.	141.000
650.000 - 1.000.000 kr.	9.400
Meira en 1.000.000 kr.	3.400
Alls	316.800

 

Hér er sem sagt verið að lýsa tekjum allra, ekki bara tekjum þeirra sem framfleyta heimilinu.  Vissulega buðu spurningar Tryggva upp á svona vitleysu, en ráðherra hefði átta að greina á milli barna og unglinga og þeirra sem halda heimili.

Í skýrslu Seðlabankans frá því í júní kom fram að meðalráðstöfunartekjur heimilanna voru í febrúar 2009 um 250.000 kr.  Já, helmingur heimila í landinu þurfti að framfleyta sér á innan við 250.000 kr. í febrúar á síðasta ári.  Staðan var talsvert skárri hjá hjónum með börnum en meðalráðstöfunartekjur þeirra voru rúmlega 500.000 kr.  Það er því beinlínis rangt hjá Seðlabankanum í svari við gagnrýni Kjartans Brodda Bragasonar að dæmin hans væru villandi.  Kjartan Broddi lýsti raunverulegum villum í gagnaframsetningu Seðlabankans.  Villa SÍ er að gera ráð fyrir að fólk geti greitt 40% af ráðstöfunartekjum í fastar afborganir lána, án tillits til tekna og fjölda í heimili.  Eins og sýnt var fram á í skýrslu Hagsmunasamtaka heimilanna frá því í júní, þá var það mat samtakanna þá að eitt af hverjum sex heimilum væri í alvarlegum skuldavanda.  Þetta má allt lesa í meðfylgjandi skýrslu, en jafnframt vil ég benda á nokkrar færslur sem ég hef ritað um þessi mál:

40% í fastar afborganir lána er ekki viðráðanlegt (11.6.2009)

Tölur Seðlabankans gefa ranga mynd - staðan er verri  (26.6.2009)

Álögur á heimilin þyngjast stöðugt - Framtíðarhorfur eru dökkar (5.7.2009)

Tölur Seðlabankans ekki nothæfar eins og þær eru kynntar (23.2.2010)

Helmingur með undir 200.000 kr

Skrár tengdar þessari bloggfærslu:

• Skuldastaða heimilanna 3. júlí 2009

Athugasemdir

[Arinbjörn Kúld, 24.2.2010 kl. 00:36]

Það á að þagga niður almenning. Kjartan Broddi fer ekki með neitt fleibur, til þess er hann of klár.

Kveðja að norðan.

[Axel Pétur Axelsson, 24.2.2010 kl. 00:53]

Hversu oft þurfa Hagsmunasamtök heimilanna að segja "told U so" við þessa voluðu ríkisÓsómaStjórn Íslands og allt prófeSORA liðið í sínum gjaldþrota háskólum.

Það fer að líta þannig út að menntakerfi landsins sé versta fjárfesting þjóðarinnar frá landnámi, Kárahnjúkar komast ekki einusinni á blað með menntaruglinu.

Hvernig stendur á því að allt þetta "hámenntaða" fólk getur bara ekki lesið tölur eða metið ástand einn millimetra fram í tímann.

Sannast nú að munurinn er mikill á milli mentunar og visku. Viskan er víst ekki á bókina lærð.

[Björn Þorri Viktorsson (IP-tala skráð) 24.2.2010 kl. 12:03]

Sæll Marinó og takk fyrir þessa eftirfylgni á útreikningum Kjartans Brodda. 

Það er umhugsunarvert og í raun alveg með ólíkindum, að endalaust skuli venjulegt fólk vera að reka rangar forsendur og útreikninga ofan í hámenntaða ríkisstarfsmenn.  Það er dapurlegt að þrátt fyrir alla hagfræðingana í Seðlabankanum og víðar um stjórnkerfið, eru greiningar og upplýsingar þessara aðila meingallaðar.  Upplýsingum og forsendum er stöðugt breytt og oft grunar mann að allt snúist um pantaðar niðurstöður, í þeim tilgangi að blekkja fólkið í landinu um raunverulega stöðu.

Hvernig gat t.d. leikið slíkur vafi um heildarskuldir þjóðarinnar mánuðum og misserum saman???