Einbjörn, Tvíbjörn, Þríbjörn og Fjórbjörn

Steingrímur sagði ekki ég, Kalli sagði ekki ég, Guðmundur sagði ekki ég og Þór sagði ekki ég.  Munurinn á þessu og litlu gulu hænunni er að enginn gengst við verkinu.  Þetta minnir óþyrmilega á dópsala neita því að hafa flutt inn dópið sem fannst í hreysi þeirra.  Á að selja almenningi það, að fjórir menn sem allir báru ábyrgð á rekstri fyrirtækja sem voru milljarða virði hafi ekki vitað hvað gerðist hjá fyrirtækjunum?  Er ekki til einhver lagagrein sem hægt er að nota til að dæma menn í ævilangt fangelsi fyrir vanhæfi, a.m.k. banna þeim að eiga og reka fyrirtæki. Látum vera þetta með að vilja ekki taka ábyrgð.

Ég hef enga trú á því að Guðmundur Ólason eða Karl Wernersson hafi ekki vitað hvað gekk á í rekstri Sjóvár.  Ef ég ætti milljarða fyrirtæki og væri með umsvif um víða veröld, þá vissi ég upp á hár hvað væri í gangi.  Nei, þeir skella sér í líki þeirra bræðra Einbjörns, Tvíbjörns og Þríbjörns og grófu upp Fjórbjörn til að búa til leikrit afneitunar. Hvernig væri að finna einhvern góðan klefa handa þeim og týna lyklinum um stundarsakir.  Kannski rifjast eitthvað upp fyrir þeim.

Sorglegast í þessu öllu finnst mér hlutur Þórs Sigfússonar.  Hann er búinn að vera í fararbroddi þess að bæta stjórnhætti fyrirtækja.  Í kjölfar bankahrunsins vann hann að slíkum reglum með Viðskiptaráði, en það er með þetta eins og margt annað, að reglurnar voru fyrir aðra en hann.  Hugsanlega sagði Steingrímur rétt frá, þegar hann kallaði Þór "nytsaman sakleysingja".

Frá mínu sjónarhorni er þetta sviðsett leikrit til að rugla almenning og yfirvöld.  Ég treysti aftur Ólafi Þór Haukssyni og hans fólki fullkomlega til að fletta ofan af þessu.  Það er ekki trúverðugt að fjórir menn viti ekki hvers vegna 10,5 milljarða skuldabréf var útbúið.  Hvað þá að ríflega 15 milljarðar hafi verið færðir úr sjóðum Sjóvár yfir í svikavafninginn Vafning.  Nei, þið verðið að reyna betur og kannski er bara gott til tilbreytingar að segja sannleikann.  Maður er alltaf að skilja betur og betur hvers vegna Geir sagði "Guð blessi Ísland".

Athugasemdir

[Jóna Kolbrún Garðarsdóttir, 23.2.2010 kl. 00:41]

Þessir sömu menn eru ennþá að reka fyrirtæki, allavega sumir þeirra. 

[Jóhannes Laxdal Baldvinsson, 23.2.2010 kl. 01:21]

Ekki gleyma aðkomu Engeyinga, þeir eru engir nýgræðingar í viðskiptum og hljóta að hafa áttað sig á á þessum tímapunkti að verið var að gambla með bótasjóðinn.  Gleymum ekki að það hafði verið mikil umræða um bótasjóðina og þessvegna er glæpurinn verri í mínum huga

[Kama Sutra, 23.2.2010 kl. 01:53]

"Er ekki til einhver lagagrein sem hægt er að nota til að dæma menn í ævilangt fangelsi fyrir vanhæfi, a.m.k. banna þeim að eiga og reka fyrirtæki."

Það sem ég er farin að óttast mjög er að allir þessir hókus-pókus svikagjörningar sem voru (og eru enn?) stundaðir í íslenska viðskiptalífinu reynist ekki einu sinni ólöglegir skv. íslenskum lögum.

Siðlaust, já.  En er þetta vafninga-svikadrasl ólöglegt?  Er bannað skv. ísl. lögum að setja heila þjóð á hausinn með lygum, svikum og prettum?

[Arinbjörn Kúld, 23.2.2010 kl. 02:05]

Ekkert annað en bylting getur bjargað þjóðinni frá þessum óskapnaði sem fjórflokkurinn og fjármálaöflin eru.

Kveðja að norðan.

[Rakel Sigurgeirsdóttir, 23.2.2010 kl. 03:37]

Þessi vörn gerendanna sem byggir á: ég vissi ekki, skildi ekki og sá ekki-rullunni er eins og hlusta á einhvern sem óx aldrei upp úr því að vera óþekkur og ofdekraður krakki. Það er eins og allur metnaður þeirra liggi í því að komast eins langt og þeir mögulega komast með hvaða aðferðum sem er! Siðferðisvitundin er þeim löngu, löngu horfin. Dómgreindin að því er virðist algerlega líka

[Hrannar Baldursson, 23.2.2010 kl. 08:03]

Hugsið ykkur hversu erfitt hlýtur að verða fyrir þessa fjóra einstaklinga að sætta sig við lífið og tilveruna í ellinni, takist þeim ekki að leiðrétta það ranglæti sem þeir hafa valdið, þegar upp rennur fyrir þeim að ekki er hægt að kaupa sér eilíft líf eða hamingju.

[Jenný Stefanía Jensdóttir, 23.2.2010 kl. 08:17]

Tek undir með Marinó og öllum ágætum innleggum hér að ofan.

Mann setur hljóðan og virkilega sorgmæddan eftir þessa afhjúpun.

"Á hverju" vöknuðu þessir menn, og hvað "gleyptu" þeir til að fá svefnró s.l. ár.