Eru til lög sem..

Eru til lög sem "banna umfjöllun um málsatvik hjá fólki sem hefur gert upp að fullu við dómskerfið og hlotið uppreist æru".  Vá!  Þýðir það að ekki má fjalla um gamalt morðmál, þar sem morðinginn er búinn að taka út dóminn?  Eða eins og í þessu tilfelli "málið sem ekki má fjalla um" varðandi "manninn sem ekki má nefna" (erum við að tala um Voldemort?).  Ef slík lög eru í gildi, þá er líka löngu orðið tímabært að herða reglurnar um það í hvaða tilfellum menn geta fengið uppreist æru.

Árni fellur frá málssókn á hendur Agnesi

Athugasemdir

[Lára Hanna Einarsdóttir, 9.9.2008 kl. 15:36]

Ágæt samlíking við Voldemort...    En gaman væri að vita hvort lögin um uppreist æru feli það í sér að ekki megi nefna málið neitt frekar - nema auðvitað sá uppreisti sjálfur þegar hann reynir að snapa samúð.

Það er ýmislegt sem ekki má nefna í íslensku samfélagi, það er svo óíslenskt. Mútur, t.d.

[Sævar Einarsson, 10.9.2008 kl. 00:39]

Hann er að vísa í almenn hegningarlög nr. 19/1940.Nánar tiltekið XXV. kafla þeirra laga sem fjallar um Ærumeiðingar og brot gegn friðhelgi einkalífs.

238. gr. Ekki er heimilt að færa fram í máli út af meiðyrðum sönnur fyrir refsiverðum verknaði, sem sá, er þeirri sök er borinn, hefur verið sýknaður af með fullnaðardómi í opinberu refsimáli hér á landi eða erlendis.
Hafi maður, er sætt hefur refsidómi fyrir einhvern verknað, síðar öðlast uppreist æru, er ekki heimilt að bera hann framar þeim sökum, og leysir sönnun því ekki undan refsingu, er svo stendur á.

Svona eru lögin gott fólk, bæði vond og góð.

[Marinó G. Njálsson, 10.9.2008 kl. 09:10]

Takk fyrir þetta, Sævarinn.  En það er a.m.k. ljóst að ekki má segja frá því að þingmaðurinn "sem ekki má nefna" framdi ódæði "sem ekki má nefna" og hlaut fyrir það 18 mánaða fangelsisdóm (sem má nefna).  Mér finnst nú fáránlegt að ekki megi fjalla um mál þeirra sem hafa fengið uppreist æru, en get skilið að ekki megi bera menn sökum sem hafa verið sýknaðir.  Á þessu er grundvallarmunur.  Annar aðilinn var dæmdur sekur af dómstólum, en hinn ekki.

Það er greinilegt að þessi bókstafur laganna er arfleifð í lögum sem hefur átt að leyfa yfirstéttinni að hreinsa kusk af hvítflipanum.  Þetta eru lög sem eru einfaldlega óframfylgjanleg, þar sem fréttaflutningur af svona sakamálum er vendilega geymdur í skjalasöfnum, filmusöfnum og á internetinu.