Íþróttamaður ársins - tækifæri að kjósa konu

Ég hjó eftir því í íþróttafréttum Bylgjunnar kl. 8:30 í morgun, að formaður samtaka íþróttafréttamanna og Heimir Karlsson telja að kjör íþróttamanns ársins verði mjög vandasamt, þar sem enginn íþróttamaður hafi virkilega skarað fram úr í ár.  Ég verð að mótmæla þessari fullyrðingu þeirra félaga. 

Það getur vel verið að enginn fótbolta- eða handboltastrákur hafi skarað fram úr, en tvær fótboltastelpur stóðu sig frábærlega, þ.e. Margrét Lára Viðarsdóttir og Ásthildur Helgadóttir.  Margrét Lára bætti markamet í íslenskum fótbolta sem enginn taldi að hægt væri að bæta og stóð sig frábærlega bæði með liði Vals og íslenska landsliðinu.  Þó Ásthildur hafi meiðst í vor og síðan orðið að leggja skóna á hilluna, þá fer ekkert á milli mála að frammistaða hennar á fyrri helmingi ársins skipar henni í hóp bestu knattspyrnumanna landsins.  Hún var máttarstólpi eins besta liðsins í sterkustu deildarkeppni kvenna í heiminum, þar sem hún var iðulega borin saman við Mörtu frá Brasilíu sem í vikunni var kjörin knattspyrnukona ársins 2007 af fyrirliðum og þjálfurum kvennalandsliða.  Bæði Margrét Lára og Ásthildur hafa skarað fram úr í íþrótt sinni á árinu og hafa náð lengra en nokkur karlkyns "boltastrákur" hefur náð, hugsanlega að undanskyldum Eiði Smára, þegar Chelsea lék til undanúrslita í Meistaradeild Evrópu um árið.

Og ef litið er út fyrir þessar tvær boltaíþróttirnar, þá má nefna að Jón Arnór Stefánsson er að standa sig frábærlega í bæði ítölsku deildinni og meistaradeild Evrópu í körfubolta og hefur frammistaða hans þar sett hann aftur á radar forráðamanna liða í NBA keppninni í Bandaríkjunum.  Birgir Leifur Hafþórsson hefur náð virkilega góðum árangri í Evrópumótaröðinni í golfi, þó svo að honum hafi ekki tekist að forðast úrtökumótin.  Hann vann eitt slíkt mót með miklum yfirburðum.  Ég efast um að nema kannski í mesta lagi tveir af núverandi landsliðsmönnum Íslands í handbolta og fótbolta hafi náð lengra en Birgir Leifur í íþrótt sinni, þ.e. Eiður Smári og Ólafur Stefánsson.

Ef við horfum til fleiri kvenna, þá höfum við eignast nýja sunddrottningu, Ragnheiði Ragnarsdóttur, sem varla má stinga sér í laugina án þess að setja nýtt Íslandsmet.   Nú Ragna Ingólfsdóttir, badmintonkona, hefur unnið alþjóðleg badmintonmót og er sem stendur í Ólympíusæti.  Svo er það hún Fríða Rún Einarsdóttir, sem varð Norðurlandameistari í öllum áhöldum og í fjölþraut á Norðurlandamóti unglinga í fimleikum fyrst íslenskra fimleikamanna.  Það er kannski ekki venjan að taka unglingameistara í vali á íþróttamanni ársins, en í kvennafimleikum þá eru margar af bestu fimleikakonum heims um eða undir 20 ára.

Ég skora á íþróttafréttamenn að velja einhverja íþróttakonu úr föngulegum hópi afrekskvenna, í staðinn fyrir að velja skásta fótbolta- eða handboltastrákinn.  Nú er tækifæri að sýna þjóðinni að þið veljið ekki íþróttamann ársins út frá vinsældum heldur frammistöðu á árinu.  Vissulega gerðu fótbolta- og handboltastrákarnir sitt besta, en Margét Lára, Ásthildur Helgadóttir, Ragnheiður Ragnarsdóttir, Ragna Ingólfsdóttir og Fríða Rún Einarsdóttir sköruðu fram úr.

Athugasemdir

[Hróðmar Vésteinn, 19.12.2007 kl. 21:45]

Af hverju að kjósa konu þegar karlar eru betri í íþróttum?

[Hróðmar Vésteinn, 19.12.2007 kl. 21:46]

Kvenna fótbolti er ömurlegur og enginn nennir að horfa á

[Snorri Örn Arnaldsson, 19.12.2007 kl. 22:10]

Þetta eru góðir punktar hjá þér, þú minnist á Jón Arnór og ég fullyrði það að af karlpeningnum þá er hann sá boltíþróttamaður sem hefur staðið sig best á þessu íþróttaári.  Ég held að Íslendingar geri sér almennt ekki grein fyrir því hversu stór körfuboltinn er í Evrópu, en á heimsvísu er körfuboltinn ein stærsta íþrótt þessarar jarðkringlu.  Evrópumenn eiga núverandi heimsmeistara (Spánverjar) og deildirnar í Evrópu eru ekki fjarri NBA deildinni í styrkleika.

[karen (IP-tala skráð) 20.12.2007 kl. 18:59]

Svo má nú ekki gleyma hestaíþróttinni, en Þorsteinn Guðmundsson íþrótta"fréttamaður" segir í einhverju blaðaviðtali, að hann skilji ekki hversvegna Landssamband Hestamanna sé aðili að Íþróttasambandi Íslands. Ég set "fréttamaður" í gæsalappir, því hann er sko ekki fréttamaður fyrir fimm aur ef hann hefur ekki tekið eftir öllu því sem hefur verið í gangi í hestaíþróttinni, td nokkrir heimsmeistaratitlar síðasta sumar í Hollandi. Að öðrum knöpum landsliðsins þar ólöstuðum, þá hefði td Þórarinn Eymundsson, verið vel að titlinum "íþróttamaður ársins" kominn. Tveir heimsmeistaratitlar eru bara brot af frábærum árangri Þórarins síðasta árið. Það sem ég skil ekki er hvers vegna maðurinn (Þorsteinn) lætur þessi orð út úr sér, að hestaíþróttin sé ekki íþrótt, þar sem hún er 3 fjölmennasta íþróttin á Íslandi, á eftir fótbolta og golfi. Þetta val hjá þessum svokölluðu fréttamönnum, binst nánast eingöngu við fótbolta, þannig að maður getur nú alveg hætt að taka mark á þessu. Afhverju skíra þeir þetta ekki bara Boltaíþróttamann ársins?

[karen (IP-tala skráð) 20.12.2007 kl. 19:04]

Afsakið, "frétta"maðurinn sem ég tala um að ofan er að sjálfsögðu Gunnarsson, en ekki Guðmundsson. Allt annað stendur.