Ertu að segja satt, Gylfi? Gögn Seðlabankans gefa annað í skyn.

Gylfi Magnússon, efnahags- og viðskiptaráðherra, og Már Guðmundsson, seðlabankastjóri, hafa farið mikinn í fjölmiðlum í dag við að verja hin aðframkomnu fjármálafyrirtæki fyrir hinum illa dómi Hæstaréttar og óþrjótandi græðgi lántaka gengistryggðra lána fyrir réttlæti og sanngirni.  Hefur verið með ólíkindum að hluta og lesa það sem frá þeim tveimur hefur komið.  Hræðsluáróðri í takt við Rússagrýlu kaldastríðsáranna hefur verið helt yfir landslýð, sem hlustar mismunandi agndofa á, enda þykjast margir merkja að verið er að reisa kjarnorkuhelt byrgi í kringum aumingja, veslings fjármálafyrirtækin og aðframkomna eigendur þeirra.

Við skulum rifja upp, að Gylfi Magnússon sagði sjálfur fyrir nokkrum dögum, að fjármálafyrirtækin færu létt með að standa af þér dóm Hæstaréttar, þó hugsanlega færu einhver tímabundið undir 16% mörk eiginfjárkröfu sem til þeirra er gerð.  En nú er komið nýtt hljóð í strokkinn, enda hefur Gylfi efnt til ólöglegra samráðsfunda með stjórnendum bankanna og passaði sig vandlega á því, að þeir sem ekki eru jábræður væru víðsfjarri.

En hvað er hæft í þeirri fullyrðingu Gylfa Magnússonar að almenningur fengi reikninginn, ef fjármálafyrirtækin væru neydd til að fara eftir dómi Hæstaréttar.  (Ég get ekki annað en velt því fyrir mér hvað stjórnvöld hefðu sagt, ef Litháarnir 5 sem dæmdir voru fyrir mansal fyrir ekki löngu hefðu velt því fyrir sér í marga daga hvernig þeir ættu að bregðast við fangelsisdómum yfir sér og fengið stuðning dómsmálaráðherra við því að komast sem léttast frá fangavistinni vegna þess að hún hefði íþyngjandi fjárhagsleg áhrif á þá.)  Jæja, hvað segja tölur Seðlabankans um hina ógnvænlegu stöðu bankanna.

Fyrst tölur frá bönkunum sjálfum.  Samkvæmt ársuppgjöri bankanna þriggja högnuðust þeir um 80 milljarða á síðasta ári.  Nam hagnaðurinn 30% arðsemi eiginfjár.  Í uppgjöri Íslandsbanka kom fram, að bankinn hafi fært 11 milljarða í sérstaka varúðarfærslu, þar sem AGS hafi bannað bankanum að tekjufæra gengishagnað sem varð til á fyrri hluta síðasta árs.  Ástæðan var að ólíklegt þótti að gengishagnaðurinn innheimtist!  Þessi 11 milljarðar voru nálægt því að jafngilda helmingi af hagnaði bankans.  Ef líkt hefur verið með hinum veslings bönkunum komið, þá voru nálægt því 36 milljarðar í það heila færðir í varúðarfærslu sem hefðu í eðlilegu árferði bæst við hagnað bankanna.  Arðsemi eiginfjár hefði því orðið 45% og hagnaður um 116 milljarðar, ef AGS hefði ekki beðið um þessa varúðarfærslu.

Næst skulum við bera saman upplýsingar um eignasöfn bankanna fyrir og eftir hrun.  Heimildirnar eru excel-skjöl Seðlabanka Íslands með tímaröðum yfir útlán.  Skoðum eftirfarandi töflu:

Seðlabanki Íslands
Upplýsingasvið
HAGTÖLUR SEÐLABANKANS
Flokkun útlána, markaðsverðbréfa og víxla innlánsstofnana - tímaraðir
M.kr	des.09	des.08	sep.08
Fyrirtæki	1.090.385	1.175.966	2.118.248
Landbúnaður	11.373	12.743	21.775
Fiskveiðar	155.639	155.245	209.970
Námugröftur og iðnaður	229.495	232.701	354.298
þ.a. vinnsla landbúnaðarafurða	8.019	7.952	15.353
þ.a. vinnsla sjávarafurða	98.742	102.386	200.252
Veitur	14.796	15.741	40.734
Byggingastarfsemi	97.725	97.066	183.355
Verslun	130.731	156.122	315.592
Samgöngur og flutningar	14.294	16.679	51.629
Þjónusta	436.332	489.667	940.895
Eignarhaldsfélög	306.183	436.556	1.702.795
Heimili	476.012	558.050	1.032.026
þ.a. íbúðalán	248.451	299.387	606.494
Óflokkað	5.068	9.568	136.759
Niðurfærslur	-105.649	-190.711	-105.068
Samtala	1.772.000	1.989.429	4.884.760
6   Gengisbundin skuldabréf
Fyrirtæki	670.968	799.916	1.441.289
Landbúnaður	6.243	6.935	12.697
Fiskveiðar	143.195	146.540	195.542
Námugröftur og iðnaður	180.696	192.839	282.123
þ.a. vinnsla landbúnaðarafurða	5.235	5.534	11.353
þ.a. vinnsla sjávarafurða	92.398	96.560	190.682
Veitur	3.381	3.544	7.519
Byggingastarfsemi	35.135	44.007	93.321
Verslun	62.045	98.575	204.744
Samgöngur og flutningar	4.493	5.437	36.568
Þjónusta	235.780	302.039	608.776
Eignarhaldsfélög	102.465	248.255	1.057.930
Heimili	105.269	135.570	271.950
þ.a. íbúðalán	40.505	57.994	107.553
Óflokkað	1.073	2.353	59.012
Niðurfærslur
Samtala	879.775	1.186.093	2.830.181

 

Efri hlutinn er heildar útlán bankakerfisins til fyrirtækja, eignarhaldsfélaga og heimila og neðri hlutinn sýnir gengisbundna hluta útlánanna.  Aftasti dálkurinn sýnir stöðuna fyrir hrun, en sá í miðið fyrstu tölur yfir útlán nýju bankanna og loks sá fremsti er staðan ári síðar.  Þetta eru merkilegar tölur. 

Ég hef bara áhuga á gengisbundnu lánunum.  Þar sjáum við fyrst að heildarútlán í gengisbundnum skuldabréfum hefur fari úr 2.830 milljörðum í september 2008 niður í 1.186 milljarða í desember sama ár.  Munurinn er rúm 58%.  Samkvæmt upplýsingum í októberskýrslu Alþjóðagjaldeyrissjóðsins, þá er mismunurinn sá afsláttur sem bankarnir fengu á flutningi innlendra lánasafna gömlu bankanna yfir í nýju bankana.  (Ég sýni ekki lán til erlendra aðila, enda urðu þau að mestu eftir í gömlu bönkunum.)  Gengisvísitalan stóð í 196,7 stigum  30. september 2008.  Hún stóð í  216 stigum 31.12.2008 og 233 stigum 31.12.2009. Þrátt fyrir talsverða hækkun gengisvísitölu, þá hefur verðmæti eignasafna lækkað. Ef verðmætið 30.9.2008 er framreiknað miðað við gengisvísitölu til hinna dagsetninganna, þá fæst að 2.830 milljarðar eru orðnir 3.118 milljarðar 31.12.2008 og 3.364 milljarðar 31.12.2009.  Mismunurinn 31.12.2008 á uppreiknuðu verði og bókfærðu verði er 1.932 milljarðar kr. og 2.484 milljarðar 31.12.2009.

Flestir sem eru með lán hjá bönkunum hafa líklegast tekið eftir því, að höfuðstóll skulda þeirra hefur verið reiknuð upp að fullu á greiðsluseðlunum.  Ég hef talað við mjög marga undan farna 17 mánuði, bæði vegna eigin skulda og fyrirtækja.  Allir segja þá sömu sögu:  Þrátt fyrir að lánasöfn hafi verið færð frá gömlu bönkunum til þeirra nýju á verulegum afslætti, þá hefur gengisbundinn höfuðstóllinn sífellt hækkað!  Þetta er í mikilli mótsögn við það sem kemur fram í gögnum Seðlabankans.  Skýringin á þessu getur bara verið ein:  Bankarnir færa kröfur á viðskiptavini í bókum sínum á einhverju allt öðru gengi, en sýnt er á greiðsluseðlum.  Þetta gengi er líklegast nær því að vera á gengisvísitölunni 100 en 233 eins og gengisvísitalan stóð um áramót.  Líklegast er að bankarnir skrái kröfur á gengi lántökudags í bókum sínum og eru því þegar búnir að bregðast við dómi Hæstaréttar í bókhaldinu, þó þeir reyni allt til að fá sem mest út úr hverri einustu kröfu.  Þess vegna var hagnaður bankanna jafnmikill og raun bar vitni þrátt fyrir mikil vanskil lána.  Það þarf svo lítið til að fá hagnað af gjalddagagreiðslu.

Að sjálfsögðu eru bankarnir búnir að fara í grimmar afskriftir hjá mörgum fyrirtækjum.  Í flestum tilfellum hafa þeir leyst fyrirtækin til sín, en um leið hafa þeir fært útistandandi kröfur niður í viðráðanlega upphæð, sem að öllu líkindum er í nánd við gengi á lántökudegi.

Hvert er þá vandamál bankanna?  Jú, það er fjármögnunin. Bankarnir eru nær eingöngu fjármagnaðir af innlánum og síðan eiginfjárframlagi.  Skoðum innlán þeirra samkvæmt tölum Seðlabankans:

Seðlabanki Íslands
Upplýsingasvið
HAGTÖLUR SEÐLABANKANS
Innlánsstofnanir
Atvinnugreinaflokkun innlána - Tímaraðir
M.kr	des.09	des.08	sep.08
Innlán, alls	1.660.069	1.704.222	3.123.293
Innlendir aðilar, alls (liðir 1-9)	1.580.424	1.600.881	1.413.423
1  Veltiinnlán í íslenskum kr.	449.234	492.500	400.298
2  Gengisb. veltiinnlán	37.670	29.803	26.951
3  Peningamarkaðsreikningar	201.447	109.537	235.989
4  Óbundið sparifé	360.403	379.134	157.521
5  Verðtryggð innlán	217.709	255.747	170.848
6  Orlofsreikningar	6.644	7.344	4.678
7  Innlán v/viðbótarlífeyrissparnaðar	74.011	62.259	50.488
8  Annað bundið sparifé	95.530	100.535	247.299
9  Innl. gjaldeyrisreikningar	137.776	164.022	119.339
Erlendir aðilar, alls	79.645	103.341	1.709.870

Lágvaxta innlán eru veltuinnlánin, gengisbundin veltuinnlán, óbundið sparifé og innlendir gjaldeyrisreikningar.  Samtölur þessara innlána eru  985/1.065/704 milljarðar í lok þessara þriggja ársfjórðunga.  Já, lágvaxta innlán bankanna 31.12.2009 voru ríflega 105 milljörðum hærri en gengistryggð útlán.  Ég hef engar forsendur til að meta vaxtamuninn, en hann er örugglega bönkunum í hag, þar sem mjög verulegur hluti gengisbundinna útlána er í hávaxtamyntum, þ.e. evrum og dollurum, en ekki jenum og frönkum.  Síðan má ekki gleyma því að LIBOR vextir eru í lágmarki núna og óraunhæft að miða ávöxtun til framtíðar við núverandi stöðu LIBOR.

Ég tel mig í þessari færslu hafa sýnt fram á tvennt:  1)  Bankarnir eru þegar búnir að gera ráð fyrir leiðréttingu gengisbundinna lána niður í gengi á lántökudegi; 2)  Lágvaxta innlán bankanna eru meiri en gengisbundin útlán eins og þau eru skráð í bókum bankanna.  Það getur vel verið að gengismunurinn á þessu tvennu sé ekki nægur sem stendur, en það er nokkuð sem bankarnir stjórna.

En svona í lokin, þá er rétt að halda því til haga, að hvorki seðlabankastjóri né ráðherra lögðu til að komið væri í veg fyrir að gengistryggingin yrði rofin og höfuðstóll lánanna tækju mið af upphaflegum höfuðstóli eins og hann hefði aldrei verið gengistryggður.  Ummæli þeirra snúast eingöngu um hvort bankarnir ráða við fjármögnunarkostnað vegna lánanna eftir að búið væri að taka af þeim stærsta tekjupóstinn, sem var gengishagnaðurinn.  Mér finnst það aftur ábyrgðarhluti hjá þeim báðum að leggjast í þessa vörn fyrir fjármálafyrirtækin áður en fullreynt er hvort hægt sé að ná samkomulagi um málalok.

Almenningur fengi reikninginn

Athugasemdir

[Eggert Guðmundsson, 23.6.2010 kl. 23:36]

Frábær samantekt hjá þér Marinó.

Síðasta greinin segir nánast allt um þessa aula sem eru að reyna að spyrna við fótum við lokaorðið.  Því skjóta þessir menn ekki þessum dómum til æðra dómsstigs? 

Þeir halda í aulaskap sínum að allir séu eins og þeir. En það er ekki svo, sem betur fer. 

Ef þeir geta ekki unað niðurstöðu Hæstaréttar Íslands, þá skulu þessir menn áfría til þess dómsstóls sem honum er æðri eða víkja úrembætti. 

Mitt mat er það að þeir mættu allir víkja sem að þessu máli hafa komið og flestir alþingismenn einnig. Því flestir eru þeir ónytungar.

Einnig er það þessi "samráðsfundur" þeirra!!!!!!!! 

Hvers vegna hafa þessir menn samáðsfund  um niðurstöðu Hæstaréttar?

Telja þeir siga hafa meira vald en Hæstiréttur Íslands?

[Margrét Sigurðardóttir, 23.6.2010 kl. 23:54]

Nú verður skemmtilegt að fylgjast með spuna stjórnvalda og auðmannamiðlanna (moggi, Fréttablaðið, Bylgjan, Stöð 2 og Rúv að ógleymdri Pressunni og hvað þetta nú allt heitir sem auðmenn eiga).

[Margrét Sigurðardóttir, 23.6.2010 kl. 23:56]

Takk Marinó fyrir þessar skýringar á mannamáli.

[Finnur Hrafn Jónsson, 24.6.2010 kl. 00:13]

Það lá fyrir áður en lánasöfn gömlu bankanna voru færð yfir í nýju bankana að verðmæti gengistryggðra lána kynni að vera takmarkað út af ólögmæti gengistryggingar. Einnig lá fyrir að ríkisstjórnin ætlaði sér að fyrna kvóta sem þýddi að lánasöfn í sjávarútvegi væri ekki mikils virði.

Samt er helst að skilja á stjórnvöldum að ekki hafi verið tekið tillit til þessara atriða þegar lán voru tekin yfir í nýja bankana.

Ég sé ekki betur en samningamenn ríkisins sem höfðu með þessi mál bankanna að gera hafi slegið skjaldborg um hagsmuni kröfuhafa í þessu yfirfærsluferli í fyrrasumar.

[Theódór Norðkvist, 24.6.2010 kl. 00:38]

Þetta er ekki í fyrsta sinn sem afætan í Seðlabankanum, sem þiggur 1,5-2 milljónir á mánuði úr lófa almennings fyrir að hóta honum öllu illu, kemur með hrakspár um að hér verði eitthvað efnahagslegt Chernobyl ef fjármálastofnanir fá ekki að ræna fólk áfram í friði.

Nákvæmlega sama sagði hann þegar Icesave-nauðungarsamningnum var hafnað af þjóðinni. Hér myndi allt hrynja, krónan, allt atvinnulíf stöðvast og hvaðeina.

Er ekki kominn tími til að taka þennan skemmdarvarg úr umferð? Áður en hann hótar fleirum eða brennir restinni af gjaldeyrisforðanum í spilamennsku á fjármálamörkuðum? Hann ætti að líta í eigin barm, þegar kemur að því að finna sökudólga fyrir hruninu hér á landi.

[Eggert Guðmundsson, 24.6.2010 kl. 00:44]

Theódór. Ég er algerlega sammála þér um þessa skemmdarvarg. En það eru miklu fleiri en Már!!! Ég ætla ekki að telja þá alla upp hér, en mér dettur strax í hug Gylfa Magnússon (Icesave = smákaka) .

Ekki skora á mig að telja upp fleiri, ég tel að þú vitirhverjir verða í upptalningunni.

[Brjánn Guðjónsson, 24.6.2010 kl. 00:54]

það er með Gylfa eins og aðrar útrunnar kjötvörur. Þær eiga heina í ruslinu.

[Brjánn Guðjónsson, 24.6.2010 kl. 00:56]

fái einhver þessarra spillingasinna sínu framgengt fullyrði ég að ég verð ekki sá eini sem mæti á Austurvöll, með eitthvað annað en eldhússáhöld.

[Sigurður Haraldsson, 24.6.2010 kl. 02:17]

Mætum á Austurvöll á morgun það er of mikið í húfi til að gera það ekki!

[Rúnar Þór Þórarinsson, 24.6.2010 kl. 15:17]

Vel greint Marínó, kærar þakkir fyrir færsluna.

[Guðmundur Ásgeirsson, 25.6.2010 kl. 03:08]

Frábær greining Marinó, og loksins er fólk almennt farið að kalla þá sem um þetta véla sínu rétta nafni: glæpamenn!

En hvað varðar öfugmæli seðlabankastjóra þá er það svosem ekkert nýtt af nálinni, eins og aðrir bankastjórar þá er hann þjálfaður í því að tala í þokukenndum öfugmælum. Ef þeir segðu einhverntímann sannleikann þá myndi nefninlega skömmu síðar vera mættur múgur af fólki með úldin matvæli og heykvíslar fyrir utan dyrnar hjá þeim! Það er hinsvegar hægt að öðlast ónæmi fyrir þessu ég er til dæmis farinn að gera það vana mínum að þegar einhver svona banka-kerfiskall eða stofnun gefur út yfirlýsingu um að eitthvað sé mjög slæmt, þá veit ég sjálfkrafa að það er líklega af hinu góða, en það sem þeir kalla gott lít ég hinsvegar ávallt með tortryggnum augum. Aðalatriðið er að treysta engu sem þeir segja nema maður geti sannreynt það á eigin skinni, og ef manni tekst ekki að skilja það sem þeir segja er það líklega vegna þess að það er einfaldlega bull sem er bara látið hljóma gáfulega.

[Guðmundur Ásgeirsson, 25.6.2010 kl. 12:56]

Eftirfarandi vakti athygli mína sem varpar nýju ljósi á þessa furðulegu hegðun Gylfa Magnússonar og Más Guðmundssonar:

1. Föstudaginn 18. júní var haldinn ríkisstjórnarfundur um dóm hæstaréttar, að honum loknum voru viðbrögðin á þá leið að stjórnvöld myndu ekkert aðhafast [innskot: og fjármálafyrirtækin hefðu þannig ekki neinn valkost nema fara að lögum].

2. Miðvikudaginn 23. júní kl. 10:00 var svo haldinn sameiginlegur fundur í efnahags- og skattanefnd og viðskiptanefnd um dómana. RÚV sagði frá því að rétt áður en fundurinn hófst á nefndarsviði Alþingis hafi Franek Rozwadowski, sendifulltrúi Alþjóðagjaldeyrissjóðsins, átt fund með Helga Hjörvar formanni efnahags- og skattanefndar.

3. Sama morgun var svo vaxtaákvörðunarfundur í Seðlabankanum kl. 11:00. [innskot: Franek hefur eflaust spjallað eitthvað við Seðlabankastjóra skömmu fyrir fundinn.]

4. Eftir þetta hófu bæði viðskiptaráðherra og Seðlabankastjóri að reka grímulausan hræðsluáróður fyrir því að fjármálafyrirtækin eigi að fá meira en raunvirði upp í kröfur sínar, og beita fyrir sig þeim rökum að annars fari allt í kalda kol [Innskot: þeir hóta semsagt bankahruni #2].

Þessi tímalína varpar sem fyrr sagði alveg nýju ljósi á atburðarásina. Fyrir hvern er Gylfi að vinna eiginlega? Ekki mig að minnsta kosti!

[Marinó G. Njálsson, 25.6.2010 kl. 17:13]

Guðmundur, við hjá HH áttum fund með Franek áðan og hann gerði ekki athugasemd við niðurstöðu Hæstaréttar, en hafði greinilega fengið, að mínu mati, vafasama leiðsögn um annað í dómnum.  Við bentum honum svo á 36. gr. laga nr. 7/1936 sem tekur af allan vafa um að rétturinn sé neytenda.

[Guðmundur Ásgeirsson, 25.6.2010 kl. 17:57]

Frábært, dugnaður ykkar við að standa vaktina er aðdáunarverður!