Mál sem aðrir ættu að fylgjast náið með

Loksins er kominn nógu stór aðili sem getur tekið til varna gegn eignaleigufyrirtækjunum.  Fróðlegt verður að fylgjast með framgangi málsins, þar sem rökin eru öll þau sömu hvort sem um er að ræða 40 vinnutæki, einkabifreið eða húsnæðislán.  Get ég ekki annað en hvatt Klæðningu til dáða og vonandi fæst botn í málið sem fyrst.  Fordæmisgildið er ótvírætt.

Auðvitað er niðurstaðan ekki sjálfgefin, en tilvísunin í forsendubresti og aðgerðir eigenda Lýsingar gegn krónunni og hagkerfinu eru okkur kunnugleg sem erum í forsvari fyrir Hagsmunasamtökum heimilanna.  Við skiljum ekki að það sé betra fyrir lánveitendur að sitja uppi með illseljanlegar eignir án tekna, en að finna lausn á málunum, þannig að tekjuflæðið haldist eins og það var áður.  Kannski er Lýsing búin að fá kaupanda erlendis, a.m.k. er ólíklegt að hann finnist hér á landi.

Ég virði alveg rétt Lýsingar til að grípa til þeirra aðgerða sem hér um ræðir, en sé ekki skynsemina í því.  Er það virkilega svo, að betra sé að taka tækin úr tekjuöflun?  Er betra að láta þau standa inni í einhverju porti og safna ryki, en að halda þeim í notkun með sömu greiðslubyrði og áður?

Klæðning hafnar kröfum Lýsingar

Athugasemdir

[corvus corax, 18.6.2009 kl. 14:46]

Það er mjög einföld skýring á þessum aðferðum Lýsingar. Þetta er okur-glæpafyrirtæki sem svífst einskis til að hafa fé af fólki og fyrirtækjum, sjaldnast með réttu en oftast með röngu. Þessu fyrirtæki stjórna skítseiði og aðferðir þess endurspeglast í eðli eigenda og stjórnenda. Svo einfalt er það nú.

[Almennur borgari (IP-tala skráð) 18.6.2009 kl. 15:12]

Ef það voru eigendur Lýsingar sem felldu gengið og ef Klæðning hefur greitt af samningum sínum við Lýsingu mun hærri upphæð en gera mátti ráð fyrir við undirritun samninga, er ekki hægt að virða rétt Lýsingar.  Hvaða munur er á þessu láni þá og þeim svívirðilegu svika-lánum sem við höfum oft rætt í þessum pistli, frá Avant, Lýsingu og glæpabönkunum?

[Almennur borgari (IP-tala skráð) 18.6.2009 kl. 20:31]

Og eitt enn: Þó eigendur Lýsingar hafi kannski ekki sjálfir fellt gengið eins og segir í fréttinni að þeir hafi gert, vitum við, eins og við höfum rætt oft um, að svikalán eru viðhöfð í landinu.