Heldur vel í lagt eða hvað?

Gaman væri nú að sjá á hverju Lars Christiansen byggir spádóma sína.  Ekki ætla ég að efast um að hann hefur reiknað þetta út, en ég býst við að forsendur hans byggi á því að krónan fari niður á það stig sem hún er skráð hjá UBS.  Hvort sú skráning er raunhæf, er ómögulegt að segja til um, en mér finnst hún fjarstæðukennd.

Sjálfur spáði ég yfir 20% verðbólgu á næstu mánuðum í færslu hér í september (sjá Skilar sér í vel yfir 20% verðbólgu og 25% stýrivöxtum á næstu mánuðum).  Þá var nú ástand efnahagsmál nokkru skárra en nú og því virðist fátt geta komið í veg fyrir slíkan skell, nema Seðlabankanum takist að koma böndum á gengið. Ef gengið hjá UBS verður ráðandi, þá fáum við yfir okkur ofurverðbólgu á við það sem Lars Christiansen er að spá.

Í gamla daga keyptu og seldu seðlabankar gjaldeyri til að skapa ró á markaði og nú þarf Seðlabanki Íslands að gera það.  Að auki er orðið lífsnauðsynlegt, að Seðlabanki Íslands geri hreinlega samninga við Seðlabanka Evrópu og seðlabanka í Sviss, Japan og Bandaríkjunum, að þessir aðilar taki þátt í því að styrkja krónuna í nafni efnahagslegra neyðaraðgerða hér á landi.  Ef þessir fjórir seðlabankar taka þátt í því að kaupa krónur í skiptum fyrir evrur, franka, jen og dollara, þá gæti komist á stöðugleiki á örfáum dögum.  Mjög ólíklegt er að þeir myndu tapa á þessu, vegna þess að sterkari króna myndi þýða fleiri evrur/frankar/jen/dollarar í kassann, þegar þeir losa síðan um krónueign sína.  Nú veit ég ekkert hvort svona samningar eru mögulegir, en við svona ástand verður ekki búið.

Spáir 75% verðbólgu á næstunni

Athugasemdir

[Björn Heiðdal, 15.10.2008 kl. 19:26]

Krónan á ekki að vera á frjálsum markaði við þessar aðstæður.  Að láta sér detta það í hug er tóm della.  Nú þarf bara að skammta og aftur skammta.  Finna réttlát skömmtunarkerfi sem flestir geta sætt sig við.  Svo er bara að vona að verðbólgan éti ekki íslensk börn því hverjum dettur í hug að fæða börn í þetta ástand.

[Magnús Sigurðsson, 15.10.2008 kl. 21:54]

Þeir hjá Danske Bank hafa áður spáð fyrir um Íslenskt efnahagslíf  og því miður fóru þeir nokkuð nærri.

[Johann Trast Palmason, 15.10.2008 kl. 22:47]

ég verð að taka undir með Magnúsi að því miður virðist íslensku hagfræðingarnir misst allt traust að sja fólk þræta fyrir svona spár minnir mann á þegar okkur var sagt hve danir væru öfundsjukir og ekki allveg með þetta en þeir voru það vist

[Jón Þorvaldur (IP-tala skráð) 15.10.2008 kl. 23:30]

Já, skrýtið með þennan dana,  alltaf þegar maður heldur að hann hafi kannski eftir allt saman verið að reyna að segja eitthvað af viti í fortíðinni slengir hann fram einhverju sem ekki er hægt að túlka öðruvísi en eintómt rugl.  ég get ekki borið mikla faglega virðingu fyrir þessum ágæta manni.  Ef verðlag á að hækka um 75% á ársgrundvelli þurfa erlendir gjaldmiðlar að hækka um ca. 150%.  Þrátt fyrir allt og allt finnst mér það ekki mjög líklegt þegar nýtt jafnvægi verður komið á sem vonandi verður á næstu vikum.