Smákrimmar dæmdir en þeir stóru sleppa

Hún er allra athygli verð frétt Morgunblaðsins um ungu mennina tvo sem stálu 2 milljónir úr spilakössum og fá fyrir það og ýmis önnur afbrot 8 og 12 mánaða fangelsi.  Langar mig að endursegja þessa frétt undir öðrum formerkjum, þ.e. fjalla um hryðjuverkamennina sem lögðu efnahag landsins í rúst.

Fréttin hljóðar þá svona í  endurritun minni:

Héraðsdómur Reykjavíkur dæmdi í morgun tvo karlmenn á fimmtugs aldri í 12 mánaða og átta mánaða skilorðsbundið fangelsi fyrir fjölda brota.

Mennirnir voru ákærðir sameiginlega fyrir að brjótast inn í Landsbankann í Austurstræti í Reykjavík á árunum 2005 - 2008 og stela þaðan 664 milljörðum krónum í reiðufé með því að búa til málamyndagjörninga. Einnig fyrir að brjótast inn í Kaupþing í Reykjavík á sama árabili en þaðan höfðu þeir á brott með sér um 1.500 milljarða króna.

Sá sem lengri dóminn hlaut var m.a. sakfelldur fyrir að ana um viðskiptalíf landsins undir áhrifum græðgi og hroka. Hann sinnti ekki varúðarorðum eða fylgdi almennu viðskiptasiðferði.

Hann var reyndar sakfelldur fyrir sex auðgunarbrot til viðbótar.  Var hann ýmist undir áhrifum græðgi eða hroka, þegar þau voru framin.

Einnig var hann sakfelldur fyrir hylmingu og fjármálamisferli. Í eitt skiptið var hann með í vörslum sínum 100 milljarða sem hann hafði greitt sjálfum sér sem arð, þó fyrirtækið hafi verið eignalaust og skilað tapi.

Maðurinn sem er 45 ára á að baki nokkurn feril í alþjóðaviðskiptum. Alloft hefur hann verið staðinn að græðgi, hroka,málamyndagjörningum og fjársvikum. Við mat á refsingu var litið til þess að hann játaði brot sín greiðlega.

Hinn maðurinn var sakfelldur fyrir fjögur græðgibrot. Í eitt skipti var hann undir áhrifum hroka og mikilmennskubrjálæðis. Tók hann þá 150 milljarða lán í bankanum sínum í nafni eignarhaldsfélags sem átti engar eignir.  Þar sem hann var aðaleigandi bankans, þá voru ekki gerðar athugasemdir við þennan gjörning. Hann var einnig tekinn með 50 milljarða arð, sem hann greiddi sjálfum sér út úr eignalausu eignarhaldsfélagi sínu, auk þess sem hann braust inn í flest fyrirtæki landsins og um 20.000 heimili og tók þaðan drjúgan hluta rekstrarfjár og ráðstöfunartekna, svo og möguleika fyrirtækja til að halda verðlagi lágu og fólki í störfum, tækifærum landsmanna til að lifa sæmilegu lífi, búa börnum sínum öruggt og heilbrigt umhverfi og svona mætti lengi telja. Maðurinn á að baki nokkurn feril í alþjóðaviðskiptum og hefur áður gerst sekur um græðgi og hroka. Leit dómurinn til gagna sem maðurinn lagði fram, sem staðfesta vilja hans til að snúa lífi sínu til betri vegar.  Hann sagðist iðrast gjörða sinna.

Nú er bara spurning einhver verði nokkru sinni dæmdur fyrir þau brot sem ég lýsi.

Stálu 2 milljónum úr spilakössum

Athugasemdir

[Doddi D (IP-tala skráð) 11.3.2010 kl. 12:35]

Brilliant

[Jón Sveinsson, 11.3.2010 kl. 12:45]

það getur ekki verið að þeir fái dóm þeir iðrast gjörða sinna og fá hin og þessi fyrirtæki til að stunda sina iðju áfram. fá síðan FJÓRAR STJÖRNUR FRÁ Jóhönnu og Steingrími með von um arðgreiðslur þegar illa gengur.

[Gísli Ingvarsson, 11.3.2010 kl. 13:23]

Það eru smælingjarnir sem verða að bera syndir samfélagsins. Ef ekki væru til fátækir aumingjar yrði að búa þá til.

[Benedikt Sigurðarson, 11.3.2010 kl. 19:59]

Alveg ljóst að lögregla og saksóknarar hafa áhuga á smá-krimmum sem ekki eru tengdir inn í voldugar fjölskyldur og pólitíska kreðsa - fremur en umsvifamikla fjárplógsmenn og útrásarvíkinga.

kv. bensi

[Snjalli Geir, 12.3.2010 kl. 12:00]

Það er hlutverk ríkisvaldsins að arðræna almúgan og púkka undir aðalinn. 

Aðallinn mun ekki sitja lengi inn ef þá nokkurn tíman.

 Frábær samantekt.

[Auður Matthíasdóttir (IP-tala skráð) 12.3.2010 kl. 16:23]

Góð endursögn.  Þetta er raunveruleikinn á Íslandi.    Tek undir með þér :  Hvort  einhver verði nokkru sinni dæmdur fyrir þau brot sem hér er lýst.