Nýtt "kostaboð" Íslandsbanka

Íslandsbanki spilar út nýju spili.  Bankinn ætlar að lækka stökkbreyttan höfuðstól gengistryggðra lána, sem vafi leikur á að sé löglegur, um heil 23% en í staðinn ætla þeir að hækka vexti um 7% strax og svo sjáum við til.  Til að láta þetta nú líta vel út, þá er bent á að mánaðarleg greiðsla lækki úr 86.000 kr. í 54.000 kr.

Skoðum þetta boð Íslandsbanka aðeins betur, eins og það er birt á vefsvæði bankans.  Bankinn tekur dæmi um 2,5 m.kr. bílalán í ótilgreindri mynt sem var tekið í nóvember 2007 til 84 mánaða.  Sagt er að lánið standi núna í 4,6 m.kr. og greiðslubyrði sé 86 þús. kr.  Næst er fullyrt að eftir leiðréttingu lækki höfuðstóllinn í um það bil 3,5 m.kr. og greiðslubyrði lánsins verði 54 þús. kr. miðað við að lánið verði lengt um 3 ár.

Það er ekki nokkur leið að sannreyna þessa útreikninga Íslandsbanka, þar sem nokkrar grunnforsendur vantar.  Ekki er nefnt hvaða mynt er notuð til viðmiðunar.  Lántökudagur skiptir líka máli, þar sem gengisbreytingar í nóvember 2007 voru nokkrar.  Japanska jenið flökti t.d. milli 0,5128 og 0,5814, en þetta nemur um 16,1% eða álíka mikið og í mars 2008.  Hvað þýðir "miðað við ákveðið gengi í lok september 2008"?  Af hverju er ekki hægt að nefna bara tiltekna dagsetningu eða hvert gengisviðmiðið er?  Ef við skoðum 29. og 30. september, þá er talsverður munur á þessum dögum með krónuna mun sterkari þann 29. og 26. september, föstudaginn á undan, er munurinn aftur mjög mikill. Mér finnst líklegast að verið sé að miða við 29. september 2008 út frá breytingu á gengisvísitölunni, en af hverju er það ekki bara sagt.  (Hafa skal í huga, að breytingin á jenum og frönkum er búin að vera meiri en breytingin á gengisvísitölunni á þessum tíma.) Svo má spyrja sig:  Af hverju er sú dagsetning valin sem notuð er?  Loks er ekki nefnt hvort óverðtryggða lánið er jafngreiðslulán eða með jöfnum afborgunum.

Áður en fólk hleypur til fer að breyta lánunum sínum, þá þarf það að fá nánari upplýsingar.  Það þarf að sjá útreikninga frá bankanum á mismunandi leiðum.  Það þarf að skýringar á mismuninum og hvaða áhrif hann hefur.  Hver er heildargreiðslubyrðin eftir hverri leið fyrir sig og greiðsludreifing.  Fá þarf upplýsingar um hvaða gengisbreytingar bankinn sér fyrir sér að verði á lánstímanum og hvernig það hefur áhrif á greiðslujafnað lán.  Einnig hvernig bankinn sér fyrir sér þróun óverðtryggðra vaxta.

Það getur vel verið að tilboð Íslandsbanka sé kostaboð, en það vantar einfaldlega allt of mikið af upplýsingum til að hægt sé að skera úr um það.  Mín tilfinning er að fólk eigi að ganga hægt um gleðinnar dyr.

Athugasemdir

[Guðrún (IP-tala skráð) 27.10.2009 kl. 12:00]

Ég er hjartanlega sammála þessu, finnst þetta allt frekar lítið heillandi og hef varað fólk eindregið við að taka þessu "kostaboði" nema í ýtrustu neyð!

[Haraldur Hansson, 27.10.2009 kl. 12:17]

Dæmið er ekki nógu skýrt hjá bankanum. Gefinn er afsláttur af vöxtum fyrstu 12 mánuðina og gefinn kostur á lengingu lánstímans. Í dæminu er miðaða við að lengt sé um 3 ár og þannig eigi eftir að borga í 8 ár af láninu.

Þetta er sett fram sem frétt/viðtal án þess að fram komi við hvern er rætt og veigamiklar forsendur vantar. Sé stoppað í götin sýnist mér að í þessu tiltekna dæmi sé hreint ekki víst að heildargreiðslan lækki um krónu. Leiðrétting á "stökkbreytingunni" verði því hugsanlega engin. Er þetta bara barbabrella? Vonandi að einhver geti varpað jákvæðu ljósi á kostaboðið.

[Marinó G. Njálsson, 27.10.2009 kl. 12:38]

Ja, hvað má vaxtamunurinn vera mikill til þess að bankinn vinni upp breytinguna á heildargreiðslunni.  Snýst þetta ekki um það? 

[Offari, 27.10.2009 kl. 12:50]

Ef höfuðstólinn lækkar tilhvers þarf þá að lengja lánstíman? 

[Dísa (IP-tala skráð) 27.10.2009 kl. 16:05]

Fjármálastofnanir vita að botninn er að detta úr, erlendu lánin verða dæmd ólögleg og þá er betra að "tryggja sig" með íslenskum lánum til að minnka tapið (og ná því upp með óverðtr. vöxtum o.fl.). Við þurfum að standa saman, við almenningur, yfirvöld standa máttlaus gegn þessum skrímlsum Við verðum að vera samtaka í að ná fram réttlátri leiðréttingu, annars munum við fella kerfið, hætta að borga og klippa þannig á súrefnið til skrímslanna. Öll veldi falla að lokum, líka þetta loftbóluveldi hér heima sem byggt er á svindli og svínaríi.

[Marinó G. Njálsson, 27.10.2009 kl. 16:16]

Við skulum hafa eitt á hreinu.  Íslandsbanki hefur gefið það út, að viðskiptavinir munu ekki afsala sér betri rétti velji þeir að breyta til.  Virða verður það sem vel er gert.